കൊച്ചി: പൊതുമേഖലാ ബാങ്കായ ഇന്ത്യൻ ഓവർസീസ് കഴിഞ്ഞ സാമ്പത്തികവർഷം നാലാം പാദത്തിൽ 350 കോടി രൂപ അറ്റാദായം നേടി. മുൻവർഷം ഇതേ പാദത്തിലെ 144 കോടിയുടെ ലാഭമാണ് ഇരട്ടിയാക്കിയത്.

2020-21 സാമ്പത്തിക വർഷം 831 കോടി രൂപയാണ് വാർഷിക അറ്റാദായം. ആറു വർഷത്തിനു ശേഷമാണ് ബാങ്ക് ഉയർന്ന വാർഷികലാഭം നേടുന്നത്. വാർഷിക വരുമാനം 20,712.48 ൽ നിന്ന് 22,524.55 കോടി രൂപയായും ഉയർന്നു. നിഷ്‌ക്രിയ ആസ്തി 14.78 ശതമാനത്തിൽ നിന്ന് 11.69 ശതമാനമായി. ബാങ്കിന്റെ ആസ്തി മൂല്യത്തിലും പുരോഗതിയുണ്ടായി. നീക്കിയിരുപ്പ് അനുപാതം 90.34 ശതമാനമായും മെച്ചപ്പെടുത്തി.