കാലടി: ആലുവ താലൂക്ക് ലൈബ്രറി കൗൺസിലിന്റെ വായനപക്ഷാചരണ പരിപാടികൾക്ക് തുടക്കമായി. പി.എൻ.പണിക്കർ അനുസ്മരണം മുതൽ ജൂലായ് 7ന് ഐ.വി. ദാസ് അനുസ്മരണം വരെയാണ് പരിപാടികൾ.

പി.എൻ പണിക്കർ അനുസ്മരണം ജില്ലാ ലൈബ്രറി കൗൺസിൽ സെക്രട്ടറി എം.ആർ.സുരേന്ദ്രൻ ഉദ്ഘാടനം ചെയ്തു. താലൂക്ക് ലൈബ്രറി കൗൺസിൽ പ്രസിഡന്റ് കെ.രവിക്കുട്ടൻ അദ്ധ്യക്ഷത വഹിച്ചു. താലൂക്ക് സെക്രട്ടറി വി.കെ. ഷാജി, വൈസ് പ്രസിഡന്റ് കെ.സി. വത്സല, കെ.പി. രജീഷ്, കെ.എ. രാജേഷ്, ഉഷ മാനാട്ട് എന്നിവർ സംസാരിച്ചു.

വൈക്കം മുഹമ്മദ് ബഷീർ മുതൽ സുഗതകുമാരി വരെയുള്ളവരുടെ കൃതികളെക്കുറിച്ചുള്ള ആസ്വാദന അവതരണം ഗ്രന്ഥശാലകളിൽ നടക്കും.

യു.പി, ഹൈസ്കൂൾ വിദ്യാർത്ഥികൾക്കുവേണ്ടി ഗാന്ധിജിയുടെ ആത്മകഥ 'എന്റെ സത്യാന്വേഷണ പരീക്ഷണങ്ങൾ' അടിസ്ഥാനമാക്കി മത്സരം സംഘടിപ്പിക്കും. ജൂലായ് 7ന് ഐ.വി.ദാസ് അനുസ്മരണ പ്രഭാഷണം കവി എസ്. രമേശൻ നടത്തും.