കൊച്ചി: ഫോർട്ടുകൊച്ചി ടൂറിസം മാസ്റ്റർപ്ലാൻ കാലാനുസൃതമായി പരിഷ്‌കരിക്കാനും വിവിധ വിഷയങ്ങൾക്ക് പരിഹാരം കാണുന്നതിനുമുള്ള ഏകോപനം ടൂറിസം ഡയറക്ടറെയും ജില്ലാ കളക്ടറെയും ചുമതലപ്പെടുത്തിയതായി മന്ത്രി മുഹമ്മദ് റിയാസ് അറിയിച്ചു. ഫോർട്ടുകൊച്ചിയിലെ വികസന പ്രവർത്തനങ്ങൾ വിലയിരുത്താൻ വിളിച്ചുചേർച്ച യോഗത്തിൽ സംസാരിക്കുകയായിരുന്നു മന്ത്രി. ഇതുമായി ബന്ധപ്പെട്ട എല്ലാ പ്രവർത്തനങ്ങളും ത്വരിതപ്പെടുത്തണം.

വിനോദസഞ്ചാരകേന്ദ്രമായ ഫോർട്ടുകൊച്ചിയിലെ ശുചീകരണത്തിൽ നേരിടുന്ന പ്രശ്‌നങ്ങൾ ജില്ലാ കളക്ടർ എസ്.സുഹാസ് മന്ത്രിയുടെ ശ്രദ്ധയിൽപെടുത്തി. ഇക്കാര്യത്തിൽ നഗരസഭ, ഡി.ടി.പി.സി, ഹെറിറ്റേജ് സൊസൈറ്റി എന്നിവർ സംയുക്തമായി ഇടപെട്ട് പരിഹരിക്കുന്നതിനുള്ള നടപടികൾ സ്വീകരിക്കാമെന്നും ഉറപ്പുനൽകി.

ലോക്ക് ഡൗൺ മൂലം ഹെറിറ്റേജ് സൊസൈറ്റിയുടെ സാമ്പത്തികപ്രയാസങ്ങളും യോഗത്തിൽ അവതരിപ്പിച്ചു. സൊസൈറ്റി പുന:സംഘടിപ്പിക്കുന്നതിനാവശ്യമായ നടപടികൾ ടൂറിസം ഡയറക്ടറുമായി ആലോചിച്ച് തീരുമാനിക്കും. കൊച്ചി മേയർ അഡ്വ. എം.അനിൽകുമാർ , കെ.ജെ. മാക്‌സി എം.എൽ.എ എന്നിവരും ഓൺലൈൻ യോഗത്തിൽ പങ്കെടുത്തു.

 ബീച്ച്

ബീച്ചിന്റെ ശാശ്വതമായ സംരക്ഷണത്തിന് ചെന്നൈ ഐ.ഐ.ടിയുടെ പഠനത്തിന്റെ അടിസ്ഥാനത്തിൽ ഇറിഗേഷൻ വകുപ്പിന്റെ നേതൃത്വത്തിൽ വിശദമായ പദ്ധതിരേഖ തയ്യാറാക്കണം.

 ചീനവല

കൊച്ചിയുടെ തനതു പാരമ്പര്യ മുഖച്ഛായയായ ചീനവലകളുടെ പുനരുദ്ധാരണത്തിനായി കിറ്റ് കോ വഴി നടക്കുന്ന പ്രവർത്തനങ്ങൾ ത്വരിതപ്പെടുത്തണം.

 ടോയ്ലെറ്റ്

ഫോർട്ടുകൊച്ചിയിൽ ടൂറിസം വകുപ്പ് നിർമ്മിക്കാനുദ്ദേശിക്കുന്ന ആധുനിക നിലവാരത്തിലുള്ള ടോയ്ലെറ്റ് സമുച്ചയത്തിന്റെ സാങ്കേതികവും നഗരസഭാ പെർമിറ്റ് അടക്കമുള്ള വിഷയങ്ങളും നഗരസഭയുമായി സഹകരിച്ച് പരിഹരിക്കണം.

 പി.ഡബ്ല്യു.ഡി. റസ്റ്റ് ഹൗസ്

ഫോർട്ടുകൊച്ചിയിലെ പി.ഡബ്ല്യു.ഡി. റസ്റ്റ് ഹൗസ് മന്ദിരം കെ.ടി.ഡി.സി.യുമായി ചേർന്ന് നവീകരിക്കുന്നതിന്റെ സാദ്ധ്യതകൾ പരിശോധിക്കുന്നതിന് ടൂറിസം ഡയറക്ടറെ ചുമതലപ്പെടുത്തി.

 ഫ്ലോട്ടിംഗ് ടൂറിസ്റ്റ് ഫെസിലിറ്റേഷൻ

ഡി.ടി.പി.സിയുടെ നേതൃത്വത്തിൽ നിർമ്മിക്കുന്ന ഫ്ലോട്ടിംഗ് ടൂറിസ്റ്റ് ഫെസിലിറ്റേഷൻ സെന്ററിന്റെ തുടർ നടപടികൾ കെ.എസ്.സി.എ.ഡി.സി മുഖേന നടത്തും.