തൃക്കാക്കര: സ്മാർട്ട്സിറ്റി ഉൾപ്പെടെയുള്ള വൻ പദ്ധതികൾ വരുന്നതു മുൻ നിർത്തി കാക്കനാട്ട് അത്യാധുനിക സൗകര്യങ്ങളോടെയുള്ള ബസ് ടെർമിനൽ കം ഷോപ്പിംഗ് കോംപ്ലക്സ് സ്ഥാപിക്കാൻ രൂപം കൊടുത്ത പദ്ധതി ഒരു പതിറ്റാണ്ടായിട്ടും ഫയലിൽ.കളക്ടറേറ്റിനും നഗരസഭ ഓഫിസിനും മദ്ധ്യേ സീപോർട്ട് എയർപോർട്ട് റോഡിനോടു ചേർന്നു കിടക്കുന്ന റവന്യു പുറമ്പോക്കു പ്രയോജനപ്പെടുത്തി പദ്ധതി നടപ്പാക്കുമെന്നു തൃക്കാക്കര പഞ്ചായത്ത് ഭരണ സമിതി 2005 ലാണ് പ്രഖ്യാപിച്ചത്. തുടർന്ന് എല്ലാ വാർഷിക ബജറ്റിലും പദ്ധതിക്കു പണം വകയിരുത്താറുണ്ട്. പഞ്ചായത്തിനെ നഗരസഭയാക്കി ഉയർത്തിയപ്പോഴും വർഷം തോറും ബസ് ടെർമിനൽ വാർഷിക പദ്ധതികളിൽ ഇടം പിടിക്കുന്നുണ്ട്. നടപടികൾ ഫയൽ വിട്ടു പുറത്തേക്കു വരുന്നില്ലെന്നു മാത്രം.റവന്യു പുറമ്പോക്കായ നിർദിഷ്ട സ്ഥലം വിട്ടുകിട്ടാനുള്ള നടപടികളും നിലച്ച മട്ടാണ്. വിദഗ്ദ്ധ ഏജൻസിയുടെ സഹായത്തോടെ ബസ് ടെർമിനലിന്റെ രൂപരേഖ തയാറാക്കുമെന്നൊക്കെ വർഷം തോറും ബജറ്റ് പ്രസംഗത്തിൽ കൃത്യമായി പറയാറുണ്ട്. റോഡിൽ നിന്നു താഴ്ന്നു കിടക്കുന്ന പ്രദേശം അതേപടി നിലനിർത്തി വിവിധ തട്ടുകളിലായി ബസ് ടെർമിനലും ഷോപ്പിംഗ് കോംപ്ലക്സും മറ്റു സൗകര്യങ്ങളും ഉണ്ടാക്കാനായിരുന്നു തീരുമാനം. ഈ പ്രദേശം ഇപ്പോൾ നഗരസഭയുടെ മാലിന്യ സംഭരണ കേന്ദ്രമാണ്.ബ്രഹ്മപുരത്തു കൊച്ചി കോർപറേഷന്റെ മാലിന്യ സംസ്കരണ കേന്ദ്രത്തിലേക്കു തൃക്കാക്കരയിലെ മാലിന്യം കൊണ്ടുപോയി തുടങ്ങുന്നതോടെ ഇവിടം കാലിയാകുമെന്നാണു പ്രതീക്ഷിച്ചിരുന്നത്.ഇപ്പോഴും ഇവിടെ മാലിന്യം തള്ളുന്നുണ്ട്. ഇതിനോടു ചേർന്നു നിലവിലുള്ള ബസ് സ്റ്റാൻഡ് പ്രദേശം കൂടി ബസ് ടെർമിനൽ പദ്ധതിക്കായി പ്രയോജനപ്പെടുത്തും വിധമാണു പദ്ധതി തയാറാക്കിയിരുന്നത്. ദീർഘദൂര ബസുകൾക്കു ഉൾപ്പെടെ പ്രവേശിക്കാനും ഹാൾട്ട് ചെയ്യാനും സൗകര്യം ഒരുക്കും വിധം രൂപരേഖ ഉണ്ടാക്കാൻ നടപടികൾ തുടങ്ങിയെങ്കിലും പുരോഗമിച്ചില്ല.രണ്ടു വശവും റോഡുള്ള സ്ഥലമാണു ടെർമിനലിനായി പരിഗണിച്ചിരുന്നത്. സീപോർട്ട് എയർപോർട്ട് റോഡിനോടു ചേർന്നു കിടക്കുന്ന പ്രദേശത്താണു ബസ് ടെർമിനൽ വരുന്നതെന്നതിനാൽ അന്തർ ജില്ലാ ബസ് സർവീസുകൾക്കും ഇവിടെ കേന്ദ്രീകരിക്കാനാകുമെന്ന വിലയിരുത്തലും ഉണ്ടായിരുന്നു.ജില്ലയുടെ കിഴക്കൻ പ്രദേശങ്ങളിൽ നിന്നു നിലവിൽ കാക്കനാട് വഴി കടന്നു പോകുന്ന ബസുകൾക്കും ഇവിടം ഇടത്താവളമാക്കാനും ലക്ഷ്യമുണ്ടായിരുന്നു. സീപോർട്ട് എയർപോർട്ട് റോഡ് നെടുമ്പാശേരി വരെ നീട്ടുന്നതോടെ കാക്കനാട് ബസ് ടെർമിനലിന്റെ സാധ്യത വർധിക്കുമെന്നായിരുന്നു നഗരസഭയുടെ വിലയിരുത്തൽ.