കൊച്ചി: കൊടകര കുഴൽപ്പണക്കേസിൽ അന്വേഷണം പുരോഗമിക്കുകയാണെന്നും മേയ് 25ന് കേസ് രജിസ്‌റ്റർ ചെയ്‌തെന്നും എൻഫോഴ്സ്‌മെന്റ് ഡയറക്ടറേറ്റ് (ഇ.ഡി) ഹൈക്കോടതിയിൽ അറിയിച്ചു. കോഴിക്കോടു നിന്ന് കൊച്ചിയിലേക്ക് കൊണ്ടുവന്ന കുഴൽപ്പണം ഏപ്രിൽ മൂന്നിന് ദേശീയപാതയിൽ കൊടകര വച്ച് ഒരു സംഘം തട്ടിയെടുത്ത സംഭവം കള്ളപ്പണം വെളുപ്പിക്കൽ തടയൽ നിയമപ്രകാരം ഇ.ഡി അന്വേഷിക്കണമെന്നാവശ്യപ്പെട്ട് ലോക് താന്ത്രിക് യുവ ജനതാദൾ ദേശീയ പ്രസിഡന്റ് സലിം മടവൂർ നൽകിയ ഹർജിയിലാണിത്. ജസ്റ്റിസ് അശോക് മേനോന്റെ ബെഞ്ചിൽ ഇന്നലെ ഹർജി പരിഗണനയ്ക്കു വന്നപ്പോൾ വിശദമായ സത്യവാങ്മൂലം നൽകാൻ ഇ.ഡിയുടെ അഭിഭാഷകൻ കൂടുതൽ സമയം തേടി. തുടർന്ന് ഹർജി രണ്ടാഴ്ച കഴിഞ്ഞ് വീണ്ടും പരിഗണിക്കാൻ മാറ്റി.