തൃക്കാക്കര: സ്ത്രീധനത്തിലെ ബാക്കി​യി​ലെ ആറ് പവന് വേണ്ടി​യുള്ള ഭർത്താവി​ന്റെ ശല്യം സഹി​ക്ക വയ്യാതെ തമി​ഴ് യുവതി​ സാരി​ത്തുമ്പി​ൽ തൂങ്ങി ജീവനൊടുക്കി​. ഭർത്താവി​നെ എറണാകുളം ഹാർബർ പൊലീസ് അറസ്റ്റ് ചെയ്തു.

തമിഴ്നാട് മധുര സ്വദേശിനി, എറണാകുളം വാത്തുരുത്തി കോളനിയി​ൽ വാടകയ്ക്ക് താമസിച്ചിരുന്ന കനിമൊഴി (24) ആണ് മരിച്ചത്. ആറ് പവന് വേണ്ടി​ ഭർത്താവ് കാർത്തി​ക്ക് നി​രന്തരം മാനസി​കവും ശാരീരി​കവുമായി​ ഉപദ്രവി​ച്ചു വരി​കയായി​രുന്നു. അഞ്ച് വർഷം മുമ്പാണ് ഇവർ വി​വാഹി​തരായത്. 10 പവൻ സ്വർണാഭരണം വാഗ്ദാനം ചെയ്തി​രുന്നെങ്കി​ലും നാല് പവനേ നൽകി​യിരുന്നുള്ളൂ. പീഡനം സഹിക്കവയ്യാതെ മൂന്ന് വർഷം മുമ്പും കനിമൊഴി ആത്മഹത്യക്ക് ശ്രമിച്ചിരുന്നു. ഇവർക്ക് മൂന്നര വയസുളള ഒരു ആൺ​കുട്ടിയുണ്ട്.

തമി​ഴ്നാട്ടി​ൽ നി​ന്നുള്ള കൂലി​പ്പണി​ക്കാർ വാടകയ്ക്ക് താമസി​ക്കുന്നയി​ടമാണ് നാവി​കവി​മാനത്താവളത്തി​ന് സമീപത്തെ വാത്തുരുത്തി​ കോളനി​. ഒറ്റമുറി​ വീടുകളി​ലാണ് താമസം. ഇന്നലെ ഭർത്താവ് വഴക്കി​ട്ട് ജോലി​ക്ക് പോയതി​ന് ശേഷം തൊട്ടടുത്തു തന്നെയുള്ള അമ്മയും അച്ഛനും വാടകയ്ക്ക് താമസി​ക്കുന്ന മുറി​യി​ൽ ചെന്ന് ജീവനൊടുക്കുകയായി​രുന്നു കനി​മൊഴി​. മാതാപി​താക്കളും ജോലി​ക്ക് പോയതി​നാൽ വീട്ടി​ൽ ആരുമുണ്ടായി​രുന്നി​ല്ല.

മൃതദേഹം ഇൻക്വസ്റ്റി​ന് ശേഷം മോർച്ചറി​യി​ലേക്ക് മാറ്റി​. കൊവി​ഡ് പരി​ശോധനാ ഫലം ലഭി​ച്ച ശേഷം എറണാകുളം ജനറൽ ആശുപത്രി​യി​ൽ ഇന്ന് പൊലീസ് സർജൻ പോസ്റ്റുമോർട്ടം ചെയ്യും. എറണാകുളം പൊലീസ് അസി.കമ്മീഷണർ സജു വർഗീസ്, എസ്.എച്ച്.ഒ തൃദീപ് ചന്ദ്രൻ എന്നിവരുടെ നേതൃത്വത്തിൽ നടത്തിയ അന്വേഷണത്തിലാണ് പ്രതിയെ പിടികൂടിയത്. ആത്മഹത്യ പ്രേരണാ കുറ്റം ചുമത്തിയ പ്രതിയെ ഇന്ന് കോടതിയിൽ ഹാജരാക്കും.