കൊച്ചി: സ്ത്രീധനമെന്ന അനാചാരത്തിനെതിരെ എസ്.എൻ.ഡി.പി യോഗം പ്രവർത്തകർ രംഗത്തിറങ്ങണമെന്നും ബോധവത്കരണ പരിപാടികൾ ഉടനെ ആരംഭിക്കണമെന്നും യോഗം ജനറൽ സെക്രട്ടറി വെള്ളാപ്പള്ളി നടേശൻ ആഹ്വാനം ചെയ്തു. എസ്.എൻ.ഡി.പി യോഗം ജില്ലാ നേതൃസമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

മന:സാക്ഷിയെ നൊമ്പരപ്പെടുത്തുന്ന സംഭവങ്ങളാണ് സ്ത്രീധനത്തിന്റെ പേരിൽ അടുത്തിടെ കേരളത്തിൽ അരങ്ങേറിയത്. സമൂഹത്തിന് ഇത് അപമാനമാണ്. ശ്രീനാരായണ ഗുരു തന്നെ സ്ത്രീധനം മക്കളെ കച്ചവടം ചെയ്യുന്ന ഏർപ്പാടാണെന്ന് പറഞ്ഞിട്ടുണ്ട്. പാവപ്പെട്ട കുടുംബങ്ങളിലെ പെൺകുട്ടികളാണ് ഈ അനാചാരത്തിന്റെ ഇരകളിലേറെയും. യോഗം വനിതാസംഘങ്ങളുടെ നേതൃത്വത്തിലും കുമാരീ സംഘങ്ങളിലൂടെയും യൂത്ത്മൂവ്മെന്റി​ലൂടെയും സ്ത്രീധനത്തെ നേരിടുന്നതിനെയും അവരിൽ ആത്മവിശ്വാസം വളർത്തുന്നതിനെയും കുറിച്ച് ക്ളാസുകൾ നൽകും.

കേരളം കൊവിഡ് മഹാമാരിയുടെ രണ്ടാം തരംഗത്തിൽ മുങ്ങിയപ്പോൾ എസ്.എൻ.ഡി.പി യോഗം ആവിഷ്കരിച്ച ഗുരുകാരുണ്യം പദ്ധതി കേരളത്തിൽ ചരിത്രം സൃഷ്ടിച്ചതായി വെള്ളാപ്പള്ളി നടേശൻ പറഞ്ഞു. കേരളത്തിലും പുറത്തുമുള്ള എസ്.എൻ.ഡി​.പി​ യൂണി​യനുകളും അയ്യായി​രത്തി​ലേറെ ശാഖകളും ചേർന്ന് കോടി​കളുടെ സഹായ പദ്ധതി​കളാണ് നടപ്പാക്കി​യത്. നി​ശബ്ദമായി​ നടന്ന ഈ സേവനപദ്ധതി​യിലൂടെ സംസ്ഥാനത്തും പുറത്തുമുള്ള പതി​നായി​രക്കണക്കി​ന് വീടുകളി​ൽ സഹായകി​റ്റുകളും അന്നവസ്ത്രാദി​കളും മരുന്നുകളും പഠനോപകരണങ്ങളും എത്തി​ച്ചതായി​ അദ്ദേഹം അറി​യി​ച്ചു.

ഓൺലൈനി​ൽ നടന്ന സമ്മേളനത്തി​ൽ ജി​ല്ലയി​ലെ ഒമ്പത് യൂണി​യനുടെയും ഭാരവാഹി​കൾ പങ്കെടുത്തു.