തൊടുപുഴ: ഇടുക്കി പാർലമെന്റ് മണ്ഡലത്തിൽ മൊബൈൻ നെറ്റ് വർക്ക്, വൈഫൈ ഹൊട്ട് സ്‌പോട്ടുകൾ, എഫ്.ടി.ടി.എച്ച് സംവിധാനങ്ങൾ എന്നിവയുടെ അപര്യാപ്തത പരിഹരിക്കുന്നതിന് ഡീൻ കുര്യാക്കോസ്എം.പി കേന്ദ്ര വാർത്താ വിതരണ പ്രക്ഷേപണ മന്ത്രി രവിശങ്കർ പ്രസാദിനേ നേരിൽ കണ്ട് യൂണിവേഴ്‌സൽ സർവ്വീസ് ഒബ്ലിക്കേഷൻ ഫണ്ടിൽ നിന്നും ട്രൈബൽ ഫണ്ടിൽ നിന്നും 4 കോടി രൂപ ആവശ്യപ്പെട്ടു. കോവിഡ് മഹാമാരിയുടെ കാലഘട്ടത്തിൽ പഠനം, ജോലി, വ്യാപാരം, ബാങ്ക് ഇടപാടുകൾ ഉൾപ്പെടെ ജീവിതത്തിലെ സമസ്ത മേഖലകളും ഓൺലൈൻ സംവിധാനത്തീലേക്ക് മാറിയ സാഹചര്യത്തിൽ ഇടുക്കിയിലെ ഇന്റർനെറ്റ് ലഭ്യതക്കുറവ് മൂലം ജനജീവിതം ദുസ്സഹമായി മാറിയിരിക്കുന്നതായി എം.പി പറഞ്ഞു. അടിക്കടിയുണ്ടാകുന്ന പ്രകൃതിക്ഷോഭങ്ങളും ഇടിമിന്നലുകളും ഓൺലൈൻ പ്രവർത്തനങ്ങളെ സാരമായി ബാധിക്കുന്നുണ്ട്. നിലവിലുള്ള ടവറുകളുടെ അപാകതകൾ പരിഹരിക്കുകയും കേബിൾ ശൃംഖല മെച്ചപ്പടുത്തുകയും ചെയ്ത് കൂടുതൽ മെച്ചപ്പെട്ട കണക്ടിവിറ്റി രൂപപ്പെടുത്തുകയും ചെയ്യേണ്ടതിന്റെ ആവശ്യകത എം.പി. മന്ത്രിയുടെ ശ്രദ്ധയിൽപ്പെടുത്തി.ഇക്കാര്യങ്ങൾ സംബന്ധിച്ച് വിശദമായ നിവേദനം ബി.എസ്.എൻ.എൽ സി.എം.ഡി. പ്രവീൺ കുമാർ പർവാറിനും കേന്ദ മന്ത്രി രവി ശങ്കർ പ്രസാദിനും എം.പി. നൽകിയിരുന്നു.