ഇടുക്കി : സ്റ്റുഡന്റ് പൊലീസ് കേഡറ്റ് പ്രോഗ്രാം ആരംഭിക്കാൻ താൽപ്പര്യമുള്ള സർക്കാർ, സർക്കാർ എയ്ഡഡ് സ്‌കൂളുകളിൽ നിന്നും പൊലീസ് വകുപ്പ് അപേക്ഷകൾ ക്ഷണിച്ചു

നിശ്ചിത മാതൃകയിലുള്ള അപേക്ഷാ ഫോറം സ്റ്റുഡന്റ് പൊലീസ് കേഡറ്റ് പദ്ധതിയുടെ വെബ്‌സൈറ്റിൽ (studentpolicecadet.org) നിന്നും ഡൗൺലോഡ് ചെയ്ത് സ്‌കൂൾ പ്രധാനാദ്ധ്യാപകൻ പൂരിപ്പിച്ച് അപേക്ഷകൾ ജൂൺ 30ന് രാത്രി 12 മണിക്കകം spcprogramme.pol@kerala.gov.in എന്ന ഇമെയിൽ മുഖാന്തിരം എസ് പി സി ഡയറക്ടറേറ്റിലും ഒരു പകർപ്പ് അതതു പൊലീസ് സ്റ്റേഷനിലും ഒരു പകർപ്പ് എസ്.പി.സി പദ്ധതിയുടെ ജില്ലാ നോഡൽ ഓഫീസിലും നേരിട്ടോ ഇ- മെയിൽ മുഖാന്തിരമോ ലഭ്യമാക്കേണ്ടതാണ്. അപേക്ഷ ഫോറത്തിന്റെ കൂടെയുള്ള അനുബന്ധം 1 & 11 എന്നിവ നിർബന്ധമായും പൂരിപ്പിച്ച് അപേക്ഷയുടെ കൂടെ അയക്കേണ്ടതാണ്. പൊലീസ് സ്റ്റേഷനുകളുടെ ഇ- മെയിൽ ഐഡി www.keralapolice.gov.in എന്ന വെബ്‌സൈറ്റിൽ ലഭ്യമാണ്. എസ് പിസി ജില്ലാ നോഡൽ ഓഫീസുകളുടെ ഇമെയിൽ ഐഡികൾ www.studentpolicecadet.org ലഭ്യമാണ്.

എസ് പിസി പദ്ധതി ആരംഭിക്കാൻ ഉദ്ദേശിക്കുന്ന ഹൈസ്‌കൂൾ വിഭാഗത്തിനോ, ഹയർ സെക്കൻഡറി വിഭാഗത്തിനോ കുറഞ്ഞത് 500 വിദ്യാർത്ഥികളെങ്കിലും ഉണ്ടായിരിക്കണം. അദ്ധ്യാപകരക്ഷാകർതൃ സമിതി സജീവമായി പ്രവർത്തിക്കുകയും, ശിശു സൗഹാർദ്ദപരമായ മനോഭാവവും സന്നദ്ധതയും ഉള്ള രണ്ട് അധ്യാപകരെ സ്‌കൂളിൽ പദ്ധതി പ്രവർത്തനങ്ങൾ നയിക്കുന്നതിനായി നിയോഗിക്കേണ്ടതും, അദ്ധ്യാപകർ കഴിവതും 50 വയസ്സിൽ താഴെയുള്ളവരും ശാരീരികക്ഷമതയുള്ളവരും ആക്ടീവായിട്ടുള്ളവരും ആയിരിക്കണം. ആൺകുട്ടികളും പെൺകുട്ടികളും ഉള്ള സ്‌കൂളുകളുടെ കാര്യത്തിൽ (കോഎഡ് സ്‌കൂളുകൾ), പ്രോഗ്രാം നയിക്കുന്നതിന് തിരഞ്ഞെടുക്കപ്പെടുന്ന അദ്ധ്യാപകരിൽ ഒരാൾ ഒരു വനിതയായിരിക്കണം. കായികക്ഷമത പരിശീലനത്തിനുള്ള ഗ്രൗണ്ട്, എസ്പിസി ഓഫീസ് സജ്ജീകരിക്കുന്നതിനുള്ള മുറി, കേഡറ്റുകൾക്ക് എസ്പിസി യൂണിഫോം, പി റ്റി ഡ്രസ്സ് എന്നിവ മാറ്റാനുള്ള സൗകര്യം, മറ്റ് അവശ്യ സൗകര്യങ്ങൾ എന്നിവ ഉണ്ടായിരിക്കണം.

അതത് എസ് എച്ച് ഓ മാരും ജില്ലാ നോഡൽ ഓഫീസർമാരും അപേക്ഷകൾ പരിശോധിച്ച് അപേക്ഷയിൽ പ്രതിപാദിച്ചിരിക്കുന്ന വസ്തുതകൾ ശരിയാണോ എന്ന് നേരിട്ട് അന്വേഷിക്കുന്നതാണ്.എസ് പിസി പദ്ധതി അനുവദിക്കുന്നതിനായി ഇതുവരെ സമർപ്പിച്ചിട്ടുള്ള അപേക്ഷകൾ കാലാവധി അവസാനിച്ചതിനെ തുടർന്ന് ഒഴിവാക്കിയതിനാൽ അത്തരം സ്‌കൂളുകൾ പുതുതായി അപേക്ഷ സമർപ്പിക്കേണ്ടതാണ്.

അപേക്ഷാ ഫോം പൂരിപ്പിക്കുന്നതുമായും പദ്ധതിയുമായും ബന്ധപ്പെട്ട സംശയ നിവാരണത്തിനായി തൊട്ടടുത്ത പൊലീസ് സ്റ്റേഷനിലോ എസ് പിസി ഡയറക്ടറേറ്റിലെ ഫോൺനമ്പറായ 04712452655 ലോ വിളിക്കാവുന്നതാണ്.