ഇടുക്കി: എംപ്ലോയ്‌മെന്റ് എക്‌സ്‌ചേഞ്ചുകൾ മുഖേന നടപ്പിലാക്കി വരുന്ന സ്വയം തൊഴിൽ പദ്ധതികളിലേക്ക് അപേക്ഷ ക്ഷണിച്ചു. അപേക്ഷാഫോറം എല്ലാ പ്രവ്യത്തി ദിവസങ്ങളിലും എംപ്ലോയ്‌മെന്റ് എക്‌സ്‌ചേഞ്ചുകളിൽ നിന്ന് സൗജന്യമായി ലഭിക്കും.'ശരണ്യ' സ്വയം തൊഴിൽ പദ്ധതി പ്രകാരം എംപ്ലോയ്‌മെന്റ് എക്‌സ്‌ചേഞ്ചുകളിൽപേര് രജിസ്റ്റർ ചെയ്തിട്ടുളള 18 നും 55 നും മദ്ധ്യേ പ്രായമുളള വിധവകൾ, വിവാഹമോചനംനേടിയ സ്ത്രീകൾ, ഭർത്താവിനാൽ ഉപേക്ഷിക്കപ്പെട്ടവർ/ഭർത്താവിനെ കാൺമാനില്ലാത്തവർ, പട്ടികവർഗ്ഗത്തിലെ അവിവിവാഹിതരായ അമ്മമാർ, മുപ്പത് വയസ്സ് കഴിഞ്ഞ അവിവാഹിതരായ സ്ത്രീകൾ, ശയ്യാവലംബരും നിത്യരോഗികളുമായ ഭർത്താക്കൻമാരുളള സ്ത്രീകൾ തുടങ്ങിയ സമൂഹത്തിലെ അശരണരായ സ്ത്രീകൾക്ക് സ്വയം തൊഴിൽ ചെയ്യുന്നതിനായി 50000 രൂപ പലിശ രഹിത വായ്പ വകുപ്പ്‌നേരിട്ട് അനുവദിക്കുന്നതും, വായ്പതുകയുടെ 50ശതമാനം സബ്‌സിഡി ആയി അനുവദിക്കും. അപേക്ഷകയുടെ കുടുംബ വാർഷിക വരുമാനം രണ്ട് ലക്ഷം രൂപയിൽ കവിയരുത്.

'കൈവല്യ' സ്വയംതൊഴിൽ പദ്ധതി പ്രകാരം 21 നും 55 നും മദ്ധ്യേ പ്രായമുളള ഭിന്നശേഷികാർക്ക് സ്വയം തൊഴിൽ ചെയ്യുന്നതിന് വകുപ്പ്‌നേരിട്ട് 50000 രൂപ വായ്പ അനുവദിക്കുന്നു. വായ്പാതുകയുടെ 50ശതമാനം സബ്‌സിഡി ലഭിക്കും. കുടുംബ വാർഷിക വരുമാനംരണ്ട് ലക്ഷം രൂപയിൽ കവിയരുത്.

'കെസ്രു' സ്വയംതൊഴിൽ പദ്ധതി പ്രകാരം ഒരു ലക്ഷം രൂപയാണ് പരമാവധി വായ്പ തുക. വായ്പാതുകയുടെ 20ശതമാനം സബ്‌സിഡി ലഭിക്കും. പ്രായപരിധി 21 നും 50 നും മദ്ധ്യേ കുടുംബ വാർഷിക വരുമാനം ഒരുലക്ഷം രൂപയിൽ കവിയരുത്. വായ്പ ജില്ലയിലെ ബാങ്കുകൾ വഴിയാണ് വിതരണം ചെയ്യുന്നത്. സംയുക്ത സംരംഭവും തുടങ്ങാവുന്നതാണ്.

'മൾട്ടി പർപ്പസ് സർവ്വീസ് സെന്റേഴ്‌സ്/ജോബ് ക്ലബ്' സ്വയംതൊഴിൽ പദ്ധതി പ്രകാരം രണ്ടോ അതിലധികമോപേർചേർന്ന് (പരമാവധി 5പേർ) ക്യഷി, വ്യവസായം, ബിസിനസ് ,സേവനമേഖലകളിൽ സംയുക്ത സംരംഭങ്ങൾ ആരംഭിക്കാം. പരമാവധി വായ്പ തുക പത്തുലക്ഷം രൂപ. പദ്ധതി ചെലവിന്റെ 25ശതമാനം (പരമാവധി രണ്ടു ലക്ഷം രൂപ) സബ്‌സിഡിയായി ലഭിക്കും. ഗുണഭോക്ത്യ വിഹിതം പദ്ധതി ചെലവിന്റെ 10ശതമാനം ആയിരിക്കും. കുടുംബ വാർഷിക വരുമാനംഒരു ലക്ഷം രൂപയിൽ കവിയരുത്. പ്രായപരിധി 21 -45 (പട്ടികജാതി/പട്ടികവർഗ്ഗ വിഭാഗത്തിൽപ്പെട്ടവർക്ക് 5 വർഷത്തേയും, മറ്റ് പിന്നാക്ക സമുദായത്തിൽപ്പെട്ടവർക്ക് 3 വർഷത്തേയും ഇളവ് അനുവദിക്കും) വായ്പകൾ ജില്ലയിലെ ബാങ്കുകൾ വഴിയാണ് വിതരണം ചെയ്യുന്നത്.

നവജീവൻ സ്വയം തൊഴിൽ പദ്ധതി പ്രകാരം 50 -65 പ്രായപരിധിക്കുളലിലുളള മുതിർന്ന പൗരൻമാർക്ക് സ്വയംതൊഴിൽ ചെയ്യുന്നതിനായി 25ശതമാനം സബ്‌സിഡിയോടുകൂടി അരലക്ഷം രൂപ വരെ ബാങ്ക് മുഖേന വായ്പ അനുവദിക്കുന്നു. അപേക്ഷകന്റെ വ്യക്തിഗത വാർഷിക വരുമാനം ഒരു ലക്ഷം രൂപയിൽ കവിയരുത്. കൂടുതൽ വിവരങ്ങൾക്ക് എംപ്ലോയ്‌മെന്റ് എക്‌സ്‌ചേഞ്ചുമായി ബന്ധപ്പെടുക.