രാജകുമാരി: മാലിന്യ സംസ്‌കരണത്തിൽ രാജകുമാരി പഞ്ചായത്ത് ലക്ഷ്യപ്രാപ്തിയിലേയ്ക്ക്. ജൈവമാലിന്യങ്ങൾ സംസ്‌കരിച്ച് വളമാക്കി മാറ്റുന്നതിനുള്ള പദ്ധതിയാണ് പഞ്ചായത്തിലെ ഓരോ വീട്ടിലും നടപ്പിലാക്കിയിരിക്കുന്നത്.സമ്പൂർണ്ണ മാലിന്യമുക്ത പഞ്ചായത്ത് എന്ന ലക്ഷ്യം മുൻനിർത്തിയാണ് 'എന്റെ മാലിന്യം എന്റെ ഉത്തരവാദിത്വം' എന്ന സംസ്ഥാന സർക്കാർ പദ്ധതിയിൽ ഉൾപ്പെടുത്തി തൊഴിലുറപ്പ് പദ്ധതിയുടെ സഹായത്തോടെ പഞ്ചായത്തിലെ ഓരോ വീട്ടിലും ജൈവമാലിന്യ സംസ്‌ക്കരണ യുണിറ്റ് നിർമ്മിച്ചത്. പഞ്ചായത്തിലെ ഓരോ വീടുകളിലെയും ജൈവമാലിന്യങ്ങൾ പഞ്ചായത്ത് നിർമ്മിച്ച് നൽകിയ കമ്പോസ്റ്റ് യൂണിറ്റിൽ നിക്ഷേപിച്ചു ജൈവവളമാക്കി മാറ്റുകയാണ് പദ്ധതി. ഇങ്ങനെ ലഭിക്കുന്ന വളം കർഷകർക്ക് അവരുടെ കൃഷിയിടങ്ങളിൽ ഉപയോഗിക്കുകയൂം ചെയ്യാം.

പഞ്ചായത്തിലെ പത്ത് വാർഡുകളിൽ പദ്ധതി നടപ്പിലാക്കി. 2019-20 സാമ്പത്തിക വർഷത്തിലാണ് മാലിന്യസംസ്‌കരണ പദ്ധതിക്ക് പഞ്ചായത്ത് തുടക്കം കുറിച്ചത് ഒന്നാം ഘട്ടത്തിൽ ആയിരം വീടുകളിലാണ് പദ്ധതി നടപ്പിലാക്കിയത്. അടുത്ത വർഷത്തോടെ മൂന്ന് ഘട്ടങ്ങളിലായി പഞ്ചായത്തിലെ മുഴുവൻ വീടുകളിലും പദ്ധതി പൂർത്തികരിക്കാനാണ് ലക്ഷ്യമിടുന്നത്. ജൈവമാലിന്യങ്ങൾ വീടുകളിൽ തന്നെ സംസ്‌കരിക്കുന്നതിനൊപ്പം അജൈവമാലിന്യങ്ങൾ ഗ്രീൻ കേരള പദ്ധതിയിൽ ഉൾപ്പെടുത്തി പഞ്ചായത്തിലെ ഹരിത കർമ്മ സേനാ അംഗങ്ങൾ വീടുകളിൽ എത്തി ശേഖരിക്കുന്നുമുണ്ട്. പദ്ധതി പൂർത്തിയാകുന്നതോടെ രാജകുമാരി ഗ്രാമപഞ്ചായത്ത് സമ്പൂർണ്ണ മാലിന്യമുക്ത പഞ്ചായത്തായി മാറും. ആദ്യഘട്ട പദ്ധതി പൂർത്തികരണത്തിന്റെ ഭാഗമായി നടുമറ്റം ധർമ്മേൽ വിനോദിന്റെ വീട്ടിൽ സ്ഥാപിച്ച കംപോസ്റ്റ് യൂണിറ്റിൽ നിന്നും ജൈവവളം ശേഖരിക്കുന്നതിന്റെ പഞ്ചായത്ത്തല ഉദ്ഘാടനം പ്രസിഡന്റ് ടിസ്സി ബിനു നിർവ്വഹിച്ചു. വൈസ് പ്രസിഡന്റ് അജേഷ് മുകളേൽ,ബ്ലോക്ക് പഞ്ചായത്ത് മെമ്പർ കെ.ജെ സിജു, ഗ്രാമപഞ്ചായത്ത് സെക്രട്ടറി ബാബു സുരേഷ്, ഗ്രാമപഞ്ചായത്ത് അംഗങ്ങൾ, ഉദ്യോഗസ്ഥർ, ഹരിതകർമ്മ സേന അംഗങ്ങൾ തുടങ്ങിയവർ പങ്കെടുത്തു.