ഇടുക്കി: കേന്ദ്രസർക്കാർ ഇന്ധന കൊള്ള അവസാനിപ്പിക്കുക എന്ന മുദ്രാവാക്യമുയർത്തി എൽ.ഡി.എഫിന്റെ നേതൃത്വത്തിൽ ജില്ലയിലെ പതിനായിരത്തോളം കേന്ദ്രങ്ങളിൽ നടത്തിയ സമരത്തിൽ പ്രതിഷേധമിരമ്പി. കൊവിഡ് പശ്ചാത്തലത്തിൽ മാനദണ്ഡങ്ങൾ പാലിച്ചായിരുന്നു സമരം. സി.പി.എം സംസ്ഥാന സെക്രട്ടേറിയറ്റ് അംഗവും മുൻ മന്ത്രിയുമായ എം.എം. മണി നെടുങ്കണ്ടത്ത് സമരം ഉദ്ഘാടനം ചെയ്തു. സി.പി.എം ജില്ലാ സെക്രട്ടറിയേറ്റംഗം പി.എൻ. വിജയൻ പങ്കെടുത്തു. സി.പി.എം ജില്ലാ സെക്രട്ടറി കെ.കെ. ജയചന്ദ്രൻ തൊടുപുഴ ഗാന്ധി സ്‌ക്വയറിലെ സമരം ഉദ്ഘാടനം ചെയ്തു. സി.പി.എം ജില്ലാ സെക്രട്ടേറിയറ്റ് അംഗം വി.വി. മത്തായി, കേരളാ കോൺഗ്രസ് (എം) തൊടുപുഴ നിയോജകമണ്ഡലം പ്രസിഡന്റ് ജിമ്മി മറ്റത്തിപ്പാറ എന്നിവർ പങ്കെടുത്തു. തൊടുപുഴ മങ്ങാട്ടുകവല സ്റ്റാൻഡിൽ നടന്ന സമരം സി.പി.ഐ ജില്ലാ സെക്രട്ടറി കെ.കെ. ശിവരാമൻ ഉദ്ഘാടനം ചെയ്തു.