കാസർകോട്: ഹയർ സെക്കൻഡറി -എസ്.എസ്.എൽ.സി മൂല്യനിർണയ കേന്ദ്രങ്ങളിലേക്ക് അദ്ധ്യാപകർക്ക് ലോക് ഡൗൺ കാലയളവിൽ തടസ്സം കൂടാതെ യാത്ര ചെയ്യാൻ കെ.എസ്.ആർ.ടി.സി സൗകര്യം ഒരുക്കുമെന്ന് കാസർകോട് ഡിപ്പോ മാനേജർ അറിയിച്ചു. തിങ്കളാഴ്ച രാവിലെ ഏഴു മണിയ്ക്ക് കാസർകോട് നിന്ന് പുറപ്പെട്ട് ദേശീയപാത നീലേശ്വരം വഴി ചായ്യോത്ത് ഗവ. ഹയർ സെക്കൻഡറി സ്കൂൾ കേന്ദ്രത്തിലേക്ക് പോകും. അവിടെ നിന്ന് തൃക്കരിപ്പൂർ മൂല്യനിർണയ കേന്ദ്രത്തിലേക്കും.

വൈകീട്ട് തൃക്കരിപ്പൂരിൽ നിന്ന് ചായ്യോത്തേക്കും അവിടെ നിന്ന് നീലേശ്വരം ദേശീയപാത വഴി കാസർകോട്ടേക്കും സർവീസ് നടത്തും. മറ്റൊരു ബസ് തിങ്കളാഴ്ച മുതൽ രാവിലെ 7 ന് പയ്യന്നൂരിൽ നിന്ന് നീലേശ്വരം -കാഞ്ഞങ്ങാട് -ചന്ദ്രഗിരി പാലം വഴി കാസർകോടെത്തി തളങ്കര മൂല്യനിർണയ കേന്ദ്രത്തിലേക്ക് സർവീസ് നടത്തും. വൈകീട്ട് തളങ്കരയിൽ നിന്ന് ചന്ദ്രഗിരി പാലം കാഞ്ഞങ്ങാട്, നീലേശ്വരം വഴി പയ്യന്നൂരിലേക്ക് സർവീസ് നടത്തും. കളക്ടർ ഡോ.ഡി.സജിത് ബാബുവിന്റെ നിർദ്ദേശപ്രകാരമാണ് പ്രത്യേക സർവീസ് നടത്തുന്നത്.