കണ്ണൂർ: കെ.പി.സി.സി പ്രസിഡന്റ് കെ.സുധാകരനെതിരെ സംസാരിച്ചത് തെറ്റിദ്ധാരണ കൊണ്ടാണെന്നും അദ്ദേഹത്തെ അച്ഛന്റെ സ്ഥാനത്താണ് കാണുന്നതെന്നും ബ്രണ്ണൻ കോളജിൽ സുധാകരനൊപ്പം പഠിച്ച ഫ്രാൻസിസിന്റെ മകൻ ജോബി പറഞ്ഞു. സുധാകരനെ കാണാൻ ഇന്നലെ രാത്രി ഒൻപത് മണിയോടെ ജോബി അദ്ദേഹത്തിന്റെ കണ്ണൂർ നടാലിലെ വീട്ടിലെത്തി. സുധാകരനോട് എന്നും ബഹുമാനമാണ്. സുധാകരനെതിരെ ഒരു നിയമ നടപടിയുടെയും ആവശ്യമില്ലെന്നും ജോബി പറഞ്ഞു.
ബ്രണ്ണൻ കോളേജിലെ പഠനകാലത്ത് പിണറായി വിജയനെ കെ.എസ്.യു പ്രവർത്തകനായ ഫ്രാൻസിസ് ആക്രമിച്ചെന്ന കെ.സുധാകരന്റെ പ്രസ്താവന നേരത്തെ വിവാദമായിരുന്നു. ഇതിനെതിരെ ഫ്രാൻസിസിന്റെ ഭാര്യയും മകനും രംഗത്ത് വന്നിരുന്നു. സുധാകരന്റെ പ്രസ്താവന വേദനിപ്പിക്കുന്നതാണെന്നും പിൻവലിച്ചില്ലെങ്കിൽ നിയമ നടപടി സ്വീകരിക്കുമെന്നും ജോബി നേരത്തെ പറഞ്ഞിരുന്നു.