ഫറോക്ക്​:​ ബേപ്പൂർ നിയോജക മണ്ഡലത്തിലെ പൊതുമരാമത്ത് റോഡുകളുടെ പ്രവൃത്തികൾ വേഗത്തിലാക്കാൻ ​ മന്ത്രി പി.എ മുഹമ്മദ് റിയാസ് വിളിച്ചു ചേർത്ത യോഗത്തിൽ തീരുമാനം. ​കി​ഫ്ബി പദ്ധതിയിൽ ഉൾപ്പെട്ട മണ്ണൂർ - ചാലിയം റോഡ് പ്രവൃത്തി കെ.എസ്.ഇ.ബി , വാട്ടർ അതോ​റി​റ്റി എന്നിവയുടെ തടസങ്ങൾ നീക്കി ഡിസംബർ 21 നകം പൂർത്തീയാക്കാൻ നിർദ്ദേശം നൽകി. ചെറുവണ്ണൂർ -കൊളത്തറ റോഡിനായി ഭൂമി ഏറ്റെടുക്കൽ പൂർത്തിയാക്കി ബഡ്ജറ്റിൽ വകയിരുത്തിയ 15 കോടിയുടെ റോഡ് നിർമ്മാണം ഉടൻ ആരംഭിക്കാനും കടലുണ്ടി റെയിൽവേ മേൽപ്പാലം നിർമ്മാണ പ്രാരംഭ പ്രവർത്തനങ്ങൾക്ക് വേഗം കൂട്ടാനും തീരുമാനമായി. തൊണ്ടിലക്കടവ് പാലത്തിന്റെ എസ്റ്റിമേറ്റ് വേഗത്തിൽ സമർപ്പിക്കാനും ഭൂമി ഏറ്റെടുക്കൽ ത്വരിതപ്പെടുത്താനും നിർദ്ദേശം നൽകി. കിഫ്ബിയിൽ ഉൾപ്പെടുത്തിയ ബേപ്പൂർ - ചെറുവണ്ണൂർ റോഡ് (ബിസി റോഡ് ), വട്ടക്കിണർ - പുലിമുട്ട് റോഡ് , ഫറോക്ക് റെയിൽവേ ഓവർ ബ്രിഡ്ജ് അപ്രോച്ച് റോഡ് എന്നിവയുടെ ഭൂമി ഏറ്റെടുക്കൽ നടപടികളും വേഗത്തിലാക്കാനും ഓരോമാസവും ഇതിന്റെ പുരോഗതി വിലയിരുത്തി റിപ്പോർട്ട് സമർപ്പിക്കാനും ജില്ലാ കലക്ടറെ ചുമതലപ്പെടുത്തി. ജി​ല്ലാ കളക്ടർ എസ്. സാംബശിവറാവു , പൊതുമരാമത്ത് റോഡ്, പാലങ്ങൾ വിഭാഗങ്ങളുടെ ഉദ്യോഗസ്ഥർ തുടങ്ങിയവർ യോഗത്തിൽ പങ്കെടുത്തു.