കൽപ്പറ്റ: വിദ്യാർത്ഥികൾക്ക് ഓൺലൈൻ മുഖേന ക്ലാസ്സുകൾ നടക്കുന്ന സാഹചര്യത്തിൽ ജില്ലയിലെ എല്ലാ പ്രദേശങ്ങളിലും ഇന്റർനെറ്റ് കണക്ടിവിറ്റി ഉറപ്പ് വരുത്തുന്നതിന് ആവശ്യമായ നടപടികൾ സ്വീകരിക്കുന്നതിന് ജില്ലാതല ടെലികോം കമ്മിറ്റി ചേർന്നു. ചില പ്രദേശങ്ങളിൽ ഇന്റർനെറ്റ് കണക്ടിവിറ്റി കുറവു മൂലം കുട്ടികൾക്ക് കൃത്യമായി ക്ലാസ്സുകളിൽ പങ്കെടുക്കാൻ സാധിക്കുന്നില്ലെന്ന പരാതികൾ ഉയർന്ന സാഹചര്യത്തിലാണ് ജില്ലാ കളക്ടർ ഡോ. അദീല അബ്ദുള്ളയുടെ അദ്ധ്യക്ഷതയിൽ ജില്ലാതല ടെലികോം കമ്മിറ്റി ചേർന്നത്.

വിദ്യാഭ്യാസ വകുപ്പ്, പട്ടികവർഗ്ഗ വികസന വകുപ്പ്, പഞ്ചായത്ത് ഡെപ്യൂട്ടി ഡയറക്ടർ, സർവ്വ ശിക്ഷാ അഭിയാൻ, ബി.എസ്.എൻ.എൽ ഉൾപ്പെടെയുളള വിവിധ ഇന്റർനെറ്റ് പ്രൊവൈഡർമാർ എന്നിവരെ ഉൾപ്പെടുത്തിയായിരുന്നു യോഗം. ജില്ലയിലെ ഇന്റർനെറ്റ് കണക്ടിവിറ്റി കുറവുള്ള പ്രദേശങ്ങളുടെ വിവരങ്ങൾ യോഗത്തിൽ പരിശോധിച്ചു.

ടവറുകൾ നിർമ്മിക്കാനുദ്ദേശിക്കുന്ന ചില പ്രദേശങ്ങളിൽ ചില ആളുകൾ പ്രവർത്തി തടസ്സപ്പെടുത്തുന്നതിനാൽ അവയുടെ നിർമ്മാണം പൂർത്തീകരിക്കാൻ സാധിക്കാത്ത സാഹചര്യമുണ്ടെന്ന് ഇന്റർനെറ്റ് ദാതാക്കൾ അറിയിച്ചു. പ്രവൃത്തി തടസ്സപ്പെടുത്താതിരിക്കാൻ തദ്ദേശ പ്രതിനിധികൾ ഇടപെടണമെന്ന് കളക്ടർ ആവശ്യപ്പെട്ടു. ടവർ നിർമാണം തടസ്സപ്പെടുത്തുന്ന കേസുകളിൽ വിശദമായ റിപ്പോർട്ട് ലഭ്യമാക്കാൻ കളക്ടർ നിർദ്ദേശിച്ചു. ഇന്റർനെറ്റ് കണക്ടിവിറ്റി കുറവുള്ള പ്രദേശങ്ങളിലെ പ്രശ്ന പരിഹാരത്തിനുള്ള നിർദ്ദേശങ്ങളും, ഇന്റർനെറ്റ് ദാതാക്കൾ പുതുതായി ടവറുകൾ സ്ഥാപിക്കാൻ ഉദ്ദേശിക്കുന്ന സ്ഥലങ്ങളുടെ വിവരം, ടവറുകൾ സ്ഥാപിക്കുന്നതിന് തടസ്സങ്ങൾ ഉണ്ടെങ്കിൽ അവയുടെ വിവരം, പകരം സ്ഥലം കണ്ടെത്തിയാൽ ചെയ്യാൻ സാധിക്കുമോ എന്നീ വിവരങ്ങൾ ഉൾപ്പെടുത്തിയുള്ള റിപ്പോർട്ട് സമർപ്പിക്കാനും കളക്ടർ നിർദ്ദേശിച്ചു.

നെറ്റ് വർക്ക് കണക്ടിവിറ്റി കൂടുതൽ മെച്ചപ്പെടുത്തേണ്ട പ്രദേശങ്ങൾ മുൻഗണനാക്രമം തയ്യാറാക്കി 29ന് നടക്കുന്ന താലൂക്ക് തല യോഗത്തിൽ ചർച്ച ചെയ്ത് തീരുമാനം എടുക്കുന്നതിന് തഹസിൽദാർമാർ, ഐ.ടി.ഡി.പി., ജില്ലാ വിദ്യാഭ്യാസ ഓഫീസർ എന്നിവരെ ചുമതലപ്പെടുത്തി. പ്രവർത്തനങ്ങളുടെ ഏകോപനത്തിനായി സബ് കളക്ടർ അർജുൻ പാണ്ഡ്യനെ ചുമതലപ്പെടുത്തി.