മുണ്ടക്കയം : കേരളത്തിൽ ഏറ്റവും കൂടുതൽ മഴ ലഭിക്കുന്ന പ്രദേശങ്ങളുടെ കണക്കിൽ മലയോര മേഖലയും. മുണ്ടക്കയവും കാഞ്ഞിരപ്പള്ളിയും ഉൾപ്പെടുന്ന മേഖലയിലാണ് ഏറ്റവും കൂടുതൽ മഴ പെയ്തിറങ്ങിയത്. കാലവർഷവും തുലാവർഷവും ഏറ്റവും കൂടുതൽ ലഭിക്കുന്ന സ്ഥലങ്ങളിൽ പീരുമേട്, കാഞ്ഞിരപ്പള്ളി താലൂക്കുകൾ ഇടംപിടിച്ചിട്ടുണ്ട്.
പശ്ചിമഘട്ടത്തിന്റെയും പെരുവന്താനം മലയോരങ്ങളുടെയും സാന്നിധ്യം ഇതിൽ പ്രധാനഘടകമായി മാറി. കൂടാതെ പെരുവന്താനം, പൊന്തൻപുഴ വനങ്ങൾ ഒരുക്കുന്ന അനുകൂല സാഹചര്യവും വനംപോലെ തിങ്ങിയ റബർതോട്ടങ്ങളുടെ സാന്നിധ്യവും അനുകൂല ഘടകങ്ങളാണ്. മൂവായിരം മില്ലിമീറ്ററിന് മുകളിൽ കാഞ്ഞിരപ്പള്ളിയിൽ ശരാശരി മഴ ലഭിക്കുന്നതായാണ് കണക്കുകൾ. വേനൽച്ചൂടിലും മുണ്ടക്കയവും കാഞ്ഞിരപ്പള്ളിയും മുന്നിലാണ്. 39 ഡിഗ്രി വരെ ഇവിടെ താപനില ഉയർന്നിട്ടുണ്ട്.