മണിമല: മണിമലയാറ്റിൽ ചാടിയ സ്‌പെഷ്യൽ വില്ലേജ് ഓഫീസറുടെ മൃതദേഹം മൂന്നു ദിവസത്തിന് ശേഷം കണ്ടെത്തി. ചങ്ങനാശേരി സ്‌പെഷ്യൽ വില്ലേജ് ഓഫീസർ എൻ. പ്രകാശിന്റെ (51) മൃതദേഹമാണ് ഇന്നലെ രാവിലെ ഏഴരയോടെ മൂങ്ങാനി തടയണ ഭാഗത്ത് കണ്ടെത്തിയത്.
തിങ്കളാഴ്‌ച രാവിലെ പത്തിനാണ് ഇയാൾ മണിമല പാലത്തിൽ നിന്ന് ചാടിയത്. ഇവിടെ നിന്ന് ഒരു കിലോമീറ്റർ മാറിയാണ് മൃതദേഹം കണ്ടെത്തിയത്. അഗ്നിരക്ഷാ സേനയും മുങ്ങൽ വിദഗ്‌‌ദ്ധരും ഈരാറ്റുപേട്ടയിൽ നിന്നുള്ള ടീം നന്മ പ്രവർത്തകരും രണ്ടുദിവസമായി തെരച്ചിൽ തുടരുകയായിരുന്നു. ഇതിനിടെയാണ് മൃതദേഹം തടയണയ്‌ക്കു സമീപം പൊങ്ങിയത്.
കങ്ങഴ സ്വദേശിയും ജോയിന്റ് കൗൺസിൽ മുൻ ജില്ലാ പ്രസിഡന്റുമായ പ്രകാശ്, ആരോഗ്യ പ്രശ്‌നങ്ങളെ തുടർന്നാണ് ആറ്റിൽ ചാടിയതെന്നാണ് സൂചന. ഭാര്യ: അമ്പിളി. മകൾ: പൂജാലക്ഷ്‌മി. മൃതദേഹം കാഞ്ഞിരപ്പള്ളി ജനറൽ ആശുപത്രി മോർച്ചറിയിൽ.