കോട്ടയം : ലോക്ക് ഡൗൺ നിയന്ത്രണങ്ങൾ ശക്തമാക്കിയ ശനി, ഞായർ ദിവസങ്ങളിൽ ഹോട്ടലുകളിൽ നിന്ന് ഹോം ഡെലിവറി മാത്രമേ അനുവദിക്കൂ എന്ന തീരുമാനം പിൻവലിക്കണമെന്ന് ഹോട്ടൽ ആൻഡ് റസ്റ്റേറന്റ് അസോസിയേഷൻ ജില്ലാ കമ്മിറ്റി സർക്കാരിനോട് ആവശ്യപ്പെട്ടു. ഇത്തരം നിയന്ത്രണങ്ങൾ ഹോട്ടൽ മേഖലയെ തകർക്കും. സർക്കാർ ജോലിക്കാരും, കൊവിഡ് സന്നദ്ധ സേനാംഗങ്ങളും, ആശുപത്രികളിൽ രോഗികളുടെ കൂട്ടിരിപ്പുകാരും അടക്കം നിരവധി ആളുകളാണ് കൊവിഡ് കാലത്തും ഹോട്ടലുകളെ ആശ്രയിക്കുന്നത്. ഇത്തരക്കാർക്ക് ഏറെ ആശ്വാസമാകുന്നതായിരുന്നു പാഴ്‌സൽ സർവീസ്. ഈ സാഹചര്യത്തിൽ പാഴ്‌സൽ നൽകാനുള്ള സൗകര്യം പുനക്രമീകരിക്കണമെന്നും ജില്ലാ പ്രസിഡന്റ് ഫിലിപ്പ് കുട്ടി, സെക്രട്ടറി എൻ.പ്രതീഷ് എന്നിവർ ആവശ്യപ്പെട്ടു.