കുമരകം : ജില്ലയിൽ കൊവിഡ് പോസിറ്റിവിറ്റി നിരക്ക് രണ്ടാമതുള്ള കുമരകത്ത് ആശങ്ക ഒഴിയുന്നില്ല. ഇന്നലെ 70 പേർക്കാണ് രോഗം സ്ഥിരീകരിച്ചത്. കഴിഞ്ഞദിവസം കുമരകത്ത് നടന്ന മെഗാക്യാമ്പിന്റെ പരിശോധന ഫലമാണ് ഇന്നലെ ലഭിച്ചത്. ഇന്നലെ വിവിധയിടങ്ങളിൽ നടന്ന പരിശോധനയിൽ കുമരകം സ്വദേശികളായ 10 പേർക്ക് കൂടി ഫലം പോസിറ്റീവ് ആയി. വ്യാപനം രൂക്ഷമായ നസ്രത്ത് വാർഡിൽ മാത്രം നാൽപ്പതോളം പേർ രോഗബാധിതരാണ്. ഇവിടെ ചേർന്ന വാർഡുതല സാനിറ്റേഷൻ കമ്മിറ്റിയോഗം നിയന്ത്രണം കൂടുതൽ ശക്തമാക്കാൻ തീരുമാനിച്ചു. തൊഴിലുറപ്പ് ജോലികൾ നിറുത്തിവയ്ക്കും. മുഴുവൻ ആളുകളയും പരിശോധനക്ക് വിധേയരാക്കും. കഴിഞ്ഞ ദിവസങ്ങളിൽ പഞ്ചായത്തിലെ തൊഴിലുറപ്പ് തൊഴിലാളികൾക്കും വ്യാപാര സ്ഥാപനങ്ങളിലെ ജീവനക്കാർക്കും പ്രാധാന്യം നൽകിയുള്ള മെഗാ പരിശോധനകളാണ് നടന്നുവന്നിരുന്നത്. ഇവരിൽ കൂടുതൽ പേരിൽ രോഗം സ്ഥിരീകരിച്ചത് ആശങ്ക ഉയർത്തിയിരിക്കുകയാണ്. ഇവരുമായി സമ്പർക്കം പുലർത്തിയവർ നിർബന്ധമായും ക്വാറന്റൈനിൽ കഴിയണമെന്നും ആരോഗ്യ വകുപ്പ് അധികൃതർ അറിയിച്ചു. വാർഡ് മെമ്പർ സേതുവിന്റെ അദ്ധ്യക്ഷതയിൽ കൂടിയ യോഗം പഞ്ചായത്ത് പ്രസിഡന്റ് ധന്യാ സാബു ഉദ്ഘാടനം ചെയ്തു.