കട്ടപ്പന: ഇരട്ടയാർ സർവീസ് സഹകരണ ബാങ്കിന്റെ നേതൃത്വത്തിൽ ആബുലൻസ് സർവീസ് ആരംഭിച്ചു. കൊവിഡ് കാലത്ത് ഇരട്ടയാറിൽ ആംബുലൻസിന്റെ സേവനമില്ലാത്തത് ജനങ്ങൾക്ക് ബുദ്ധിമുട്ടായ സാഹചര്യത്തിലാണ് ബാങ്കിന്റെ ഇടപെടൽ. അവശ്യ ഘട്ടങ്ങളിൽ പോലും പഞ്ചായത്തിലുള്ളവർക്ക് ആംബുലൻസ് സേവനം ലഭിച്ചിരുന്നില്ല. ചെമ്പകപ്പാറ പി.എച്ച്.സിയിലും ആംബുലൻസ് ഇല്ല. തുടർന്ന് ബാങ്ക് ഭരണസമിതിയുടെ നേതൃത്വത്തിൽ മിതമായ നിരക്കിൽ ഇരട്ടയാറിലുള്ളവർക്ക് സേവനം ലഭ്യമാക്കാനായി ആംബുലൻസ് വാങ്ങുകയായിരുന്നു. മുൻ മന്ത്രി എം.എം. മണി ഫ്‌ളാഗ് ഓഫ് ചെയ്തു. ബാങ്ക് പ്രസിഡന്റ് ജിൻസൺ വർക്കി, കട്ടപ്പന ബ്ലോക്ക് പഞ്ചായത്ത് പ്രസിഡന്റ് ജോസുകുട്ടി കണ്ണമുണ്ടയിൽ, ബാങ്ക് വൈസ് പ്രസിഡന്റ് വിനോദ് നെല്ലിക്കൽ, ബ്ലോക്ക് പഞ്ചായത്ത് അംഗം ലാലച്ചൻ വെള്ളക്കട, ശാന്തിഗ്രാം സർവീസ് സഹകരണ ബാങ്ക് പ്രസിഡന്റ് ജോയി ജോർജ്, പി.ബി. ഷാജി, ബാങ്ക് സെക്രട്ടറി ഉല്ലാസ് സെബാസ്റ്റ്യൻ തുടങ്ങിയവർ പങ്കെടുത്തു.