രാജാക്കാട് : കൊച്ചുമുല്ലക്കാനത്ത് ബിഎസ്എൻഎൽ ടവറിന്റെ മുകളിൽ കുടുങ്ങിയ ജീവനക്കാരനെ അടിമാലി ഫയർഫോഴ്‌സ് എത്തി രക്ഷപെടുത്തി.
ഇന്നലെ ഉച്ചകഴിഞ്ഞ് മൂന്നോടെയാണ് സംഭവം. സ്വകാര്യ വ്യക്തിയുടെ പുരയിടത്തിൽ സ്ഥാപിച്ചിരിക്കുന്ന ടവറിൽ അറ്റകുറ്റപ്പണികൾക്കായി കയറിയ പത്തനംതിട്ട കൊടുമൺ അജിത് ഭവനിൽ അജിത്ത് (26) ആണ് കുടുങ്ങിയത്.അജിത്തിന് താഴെ ഇറങ്ങാൻ കഴിയാതെ വന്നതോടെ കൂടെയുണ്ടായിരുന്നവർ അടിമാലി ഫയർ ഫോഴ്‌സിലും രാജാക്കാട് പൊലീസിലും വിവരമറിയിച്ചു. പൊലീസും ഫയർ ഫോഴ്‌സ് യൂണിറ്റ് അംഗങ്ങളും സ്ഥലത്തെത്തി . ഫയർഫോഴ്‌സ് ഉദ്യോഗസ്ഥർ ടവറിൽ കയറി വലയും വടവും ഉപയോഗിച്ച് അജിത്തിനെ താഴെയിറക്കി. തുടർന്ന് സ്വകാര്യ ആശുപത്രിയിൽ എത്തിച്ച് പ്രാഥമിക ചികിത്സ നൽകിയ ശേഷം അടിമാലി താലൂക്ക് ആശുപത്രിയിൽ പ്രവേശിപ്പിച്ചു.