ശാന്തൻപാറ: കൂന്തപ്പനത്തേരിയിൽ വീടിന് തീ പിടിച്ച് വീട്ടുപകരണങ്ങളും കുട്ടികളുടെ പഠനോപാധികളും കത്തി നശിച്ചു. ഇന്നലെ രാവിലെ ഒമ്പതരയോടെ പി. മാരിമുത്തുവിന്റെ വീടാണ് ഭാഗികമായി കത്തി നശിച്ചത്. വൈദ്യുതി ഷോർട് സർക്യൂട്ടാണ് കാരണമെന്നാണ് പ്രാഥമിക നിഗമനം. സംഭവം നടക്കുമ്പോൾ മാരിമുത്തു, ഭാര്യ ചെന്താമര, മകൾ മണിമേഖല എന്നിവർ വീടിന്റെ സമീപത്തെ കൃഷിയിടത്തിലായിരുന്നു. മണിമേഖലയുടെ മക്കളായ വസന്തും വാസുവും മുറ്റത്ത് കളിച്ചു കൊണ്ടിരിക്കുകയായിരുന്നു. വൻ തോതിൽ പുക ഉയരുന്നതു കണ്ട് മാരിമുത്തു ഓടിയെത്തിയപ്പോഴാണ് കിടപ്പു മുറിയിൽ തീ പടർന്നത് കണ്ടത്. വീട്ടിൽ ഉണ്ടായിരുന്ന വെള്ളമൊഴിച്ച് തീ കെടുത്തിയെങ്കിലും കട്ടിലും അലമാരകളും രണ്ട് മൊബൈൽ ഫോണുകളും കത്തി നശിച്ചു. ശാന്തൻപാറയിലെ സ്വകാര്യ സ്‌കൂളിൽ 6, 7 ക്ലാസുകളിൽ പഠിക്കുന്ന വസന്തിനും വാസുവിനും ഓൺലൈൻ പഠനത്തിനായി അടുത്തിടെ വാങ്ങിയ ഫോണുകളാണ് കത്തി നശിച്ചത്.