മുണ്ടക്കയം : നിർമാണം പൂർത്തീകരിച്ച പുത്തൻചന്ത കെ.എസ്.ആർ.ടി.സി ഓപ്പറേറ്റിംഗ് സെന്റർ നോക്കുകുത്തിയായിട്ട് 6 വർഷം. കടുത്ത സാമ്പത്തികപ്രതിസന്ധിയിലായ കെ എസ്.ആർ.ടി.സിയ്ക്ക് ഡിപ്പോയിലെ പുതിയ തസ്തികകളടക്കമുള്ള ഭൗതികസാഹചര്യങ്ങൾ ക്രമീകരിക്കാൻ ഭാരിച്ച തുക മുതൽ മുടക്കേണ്ടതിനാലാണ് കാലതാമസം നേരിടുന്നതെന്നാണ് അധികൃതരുടെ വിശദീകരണം. 2015 ലാണ് പഞ്ചായത്തുവക സ്ഥലത്ത് കെട്ടിടം നിർമിച്ചത്. ഇത് വിട്ടു നൽകണമെന്നാവശ്യപ്പെട്ട് പഞ്ചായത്ത് ഭരണസമിതി കോർപ്പറേഷന് കത്ത് നൽകിയിരിക്കുകയാണ്. ഇതിനുള്ള നടപടി ക്രമങ്ങൾ ആരംഭിച്ചതായി പഞ്ചായത്ത് പ്രസിഡന്റ് രേഖ ദാസ് അറിയിച്ചു.

പഞ്ചായത്തിന് വിട്ടുനൽകിയാൽ

69 ലക്ഷം രൂപ വിനിയോഗിച്ചാണ് സ്റ്റേഷൻ മാസ്റ്റർ ഓഫീസ്, ഗാരേജ്, പ്ലാറ്റ്‌ഫോം എന്നിവ നിർമ്മിച്ചത്. കെട്ടിടം പഞ്ചായത്തിന് വിട്ടുനൽകിയാൽ വാടകക്കെട്ടിടങ്ങളിൽ പ്രവർത്തിക്കുന്ന വൈദ്യുതിവകുപ്പ്, ജലഅതോറിട്ടി ഉൾപ്പെടെയുള്ള മറ്റ് ഓഫീസുകൾ ഇവിടേക്ക് മാറ്റി പ്രവർത്തനമാരംഭിക്കാനാകും. കൂടാതെ പകൽവീട് ഉൾപ്പെടെയുള്ള നിരവധി പദ്ധതികളും ആവിഷ്‌കരിക്കാം. സർക്കാർ ഓഫീസുകൾ ഉൾപ്പെടെ വന്നാൽ പുത്തൻ ചന്തയുടെ വികസനത്തിന് വഴിയൊരുക്കും.

നിർമ്മാണ ചെലവ് : 69 ലക്ഷം

കെട്ടിടം നിർമ്മിച്ചത് : 2015