ന്യൂഡൽഹി: കൊവിഡ് ബാധ കുട്ടികളെ ​ഗുരുതരമായി ബാധിക്കുന്ന സാഹചര്യം ഇതുവരെ ഉടലെടുത്തിട്ടില്ല. അവരെ ആശുപത്രിയിൽ പ്രവേശിപ്പിക്കേണ്ടെ ആവശ്യകതയും നിലവിൽ വളരെ കുറവാണ്. എന്നാൽ കൊവിഡ് മൂന്നാം തരം​ഗം കുട്ടികളെ ​ഗുരുതരമായി ബാധിക്കുമെന്ന ആശങ്ക നിലനിൽക്കുന്നതിനാൽ തയ്യാറെടുപ്പുകളുമായി മുന്നോട്ട് പോവുകയാണെന്ന് കേന്ദ്രം അറിയിച്ചു.

കുട്ടികളിലെ കൊവിഡ് ബാധയിൽ ഞങ്ങൾ കൂടുതൽ ശ്രദ്ധ കേന്ദ്രീകരിക്കുകയാണ്. കുട്ടികളിൽ അണുബാധ ഉണ്ടാകാറുണ്ടെങ്കിലും ലക്ഷണങ്ങൾ പൊതുവെ കുറവാണ്. രോഗം ബാധിക്കാറുണ്ടെങ്കിൽ തന്നെ ​ഗുരുതരമാകാറില്ല. ആശുപത്രിയിൽ പ്രവേശിപ്പിക്കേണ്ടതിന്റെ ആവശ്യകതയും വളരെക്കുറവാണെന്ന് നീതി ആയോ​ഗ് അം​ഗം ഡോ. വി.കെ. പൗൾ മാദ്ധ്യമങ്ങളോട് പറഞ്ഞു.

വെെറസിന്റെ നിലവിലെ സ്വഭാവത്തിൽ മാറ്റം വരാൻ സാദ്ധ്യതയുണ്ട്. കൊവിഡിന്റെ ആഘാതം കുട്ടികളിൽ വർദ്ധിച്ചേക്കാം. കുറച്ച് കുട്ടികളെ ആശുപത്രിയിൽ ഇതുവരെ പ്രവേശിപ്പിച്ചിട്ടുളളതായി ഡാറ്റ വ്യക്തമാക്കുന്നു. ഞങ്ങൾ ദിവസം തോറും തയ്യാറെടുപ്പുകൾ നടത്തുകയാണെന്നും പൗൾ കൂട്ടിച്ചേർത്തു.