ന്യൂഡൽഹി: സെൻട്രൽ ബ്യൂറോ ഓഫ് ഇൻവെസ്റ്റിഗേഷന്‍റെ( സി ബി ഐ) കീഴിൽ ജോലി ചെയ്യുന്ന എല്ലാ ഉദ്യോഗസ്ഥരും ജീവനക്കാരും ഇനി മുതൽ ഓഫീസുകളിൽ ഔപചാരിക വേഷം മാത്രം ധരിക്കണമെന്ന് നിർദേശം. ജീൻസ്, സ്പോർട്‌സ് ഷൂസ് മുതലായ വസ്ത്രങ്ങൾ ഇനി അനുവദിക്കില്ലെന്ന് സി ബി ഐ ഡയറക്‌ടർ സുബോധ് കുമാർ ജയ്‌സ്വാൾ അറിയിച്ചു.
സി ബി ഐ ഓഫീസുകളിലെ വസ്ത്രധാരണ ചട്ടം പുതുക്കികൊണ്ടാണ് ഔപചാരിക വസ്ത്രങ്ങൾ നിർബന്ധമാക്കി ഉത്തരവിറക്കിയിരിക്കുന്നത്. പുരുഷന്മാർക്ക് ഷർട്ട്, ഫോർമൽ പാന്‍റ്, ഫോർമൽ ഷൂസ് എന്നിവ ധരിക്കാമെന്നും പൂർണമായും ഷേവ് ചെയ്‌തി‌ട്ട് മാത്രമേ ഓഫീസിൽ വരാൻ പാടുള്ളൂ എന്നും ഇതു സംബന്ധിച്ച് പുറത്തിറക്കിയ ഉത്തരവിൽ പറയുന്നു.
ജീവനക്കാരോ ഉദ്യോഗസ്ഥരോ ആയ സ്ത്രീകൾ സാരി, സ്യൂട്ട്, ഫോർമൽ ഷർട്ട്, പാന്‍റ് എന്നിവ മാത്രമേ ധരിക്കാവൂ എന്നും നിർദേശമുണ്ട്. ജീൻസ്, ടീ ഷർട്ട്, സ്പോർട്‌സ് ഷൂസ്, ചെരിപ്പ്, കാഷ്വൽ ആയ മറ്റ് വസ്ത്രങ്ങൾ എന്നിവ ഓഫീസിനുള്ളിൽ ധരിക്കരുത്. രാജ്യത്തെമ്പാടുമുള്ള സി ബി ഐ ഓഫിസുകളിൽ ഉത്തരവ് നടപ്പാക്കണമെന്ന് ബ്രാഞ്ച് തലവന്മാർക്ക് നിർദേശം നൽകിയിട്ടുണ്ട്.