അരിയിൽ പ്ലാസ്റ്റിക് ചേർത്തിട്ടുണ്ടോ എന്നറിയാൻ ഒരു ഗ്ലാസ് വെള്ളം എടുത്തതിനു ശേഷം അതിലേക്ക്‌ കുറച്ച് അരിമണികൾ ഇട്ട്‌ ഇളക്കുക. പ്ലാസ്റ്റിക് അരിമണികൾ വെള്ളത്തിനു മുകളിൽ പൊങ്ങിക്കിടക്കുകയും മറ്റുള്ളവ താഴെ അവശേഷിക്കുകയും ചെയ്യും. അരിക്ക് നിറം ലഭിക്കുന്നതിനായി വിവിധ രാസപദാർത്ഥങ്ങൾ അവയിൽ കലർത്താറുണ്ട്. ഇവയുടെ സാന്നിദ്ധ്യം അറിയുന്നത് അരി കഴുകുമ്പോഴാണ്. നന്നായി കുലുക്കിക്കഴിയുമ്പോൾ നിറം ഇളകിപ്പോകുന്നത് കാണാം. പഞ്ചസാരയിൽ സാധാരണ ചേർക്കുന്ന മായം ചോക്കുപൊടിയാണ്. ശുദ്ധമായ പഞ്ചസാര ഒരു ഗ്ലാസ് വെള്ളത്തിൽ ഇടുകയാണെങ്കിൽ അവ നേരേ അടിത്തട്ടിലേക്ക് മുങ്ങിപ്പോകും. എന്നാൽ, മായം ചേർത്തിട്ടുണ്ടെങ്കിൽ ഇവ വെള്ളത്തിനു മുകളിൽ പൊങ്ങി നിൽക്കും. ഉപ്പിൽ അധികമായി ചേർത്തു കാണപ്പെടുന്ന ഒരു വ‌സ്‌തുവാണ് കാത്സ്യം കാർബണേറ്റ്. ഉപ്പിൽ ഇതുണ്ടോ എന്ന് പരിശോധിക്കാനായി ഒരു സ്‌പൂൺ ഉപ്പ് ഒരു ഗ്ലാസ് വെള്ളത്തിൽ കലക്കുക. കലങ്ങിക്കഴിയുമ്പോൾ, വെള്ളത്തിന് വെളുത്ത നിറം വരികയാണെങ്കിൽ ഇവയിൽ മായം കലർന്നിട്ടുണ്ട്. കലക്കിയ വെള്ളം സാധാരണ വെള്ളത്തിന്റെ നിറത്തിലാണെങ്കിൽ ആ ഉപ്പ് ശുദ്ധമാണ്. വെളിച്ചെണ്ണയിൽ മായമുണ്ടോന്ന് അറിയാനായി കുറച്ച് വെളിച്ചെണ്ണ ഒരു ചില്ലുഗ്ലാസിൽ എടുക്കുക. അത് അരമണിക്കൂർ ഫ്രിഡ്‌ജിൽ വയ്‌ക്കുക. വെളിച്ചെണ്ണയിൽ മായം ചേർത്തിട്ടുണ്ടെങ്കിൽ ഇവ വേറൊരു പാളിയായി കാണപ്പെടും.