ന്യൂഡൽഹി: ആദായ നികുതി പോർട്ടൽ പുറത്തിറക്കിയതിന് പിന്നാലെ തകരാറിലായി. സംഭവത്തിൽ ധനമന്ത്രി നിർമല സീതാരാമൻ അതൃപ്തി പ്രകടിപ്പിച്ചു. ഉടൻ പ്രശ്‌നം പരിഹരിക്കണമെന്ന് ഇൻഫോസിസിനും സഹസ്ഥാപകനും ചെയർമാനുമായ നന്ദൻ നിലേകനിയ്ക്കും ധനമന്ത്രി നിർദേശം നൽകി.
ഉടൻ പ്രശ്‌നം പരിഹരിക്കാമെന്ന് നന്ദൻ നിലേകനി നിർമല സീതാരാമന് ഉറപ്പുനൽകി. സംഭവത്തിൽ ഇൻഫോസിസ് ഖേദം പ്രകടിപ്പിച്ചു. തിങ്കളാഴ്ച രാത്രിയാണ് പഴയ പോർട്ടൽ പിൻവലിച്ച് പുതിയ വെബ്‌സൈറ്റ് പുറത്തിറക്കിയത്.
2019ലാണ് ആദായ നികുതി ദായകർക്ക്‌ കൂടുതൽ സൗകര്യമൊരുക്കുന്നതിന്റെ ഭാഗമായി പുതിയ തലമുറ ഐടി റിട്ടേൺ സൈറ്റ് രൂപപ്പെടുത്താൻ കേന്ദ്ര സർക്കാർ ഇൻഫോസിസിനെ ചുമതലപ്പെടുത്തിയത്. ആദായ നികുതി പ്രൊസസിങ് സമയം 63 ദിവസത്തിൽനിന്ന് ഒരുദിവസമാക്കികുറയ്ക്കുകയെന്ന ദൗത്യവും ഇതിനുപിന്നിലുണ്ടായിരുന്നു. 4,241 കോടിയാണ് പദ്ധതിക്കുവേണ്ടി ചെലവഴിച്ചത്.