മുംബയ്: കനത്ത മഴയെ തുടർന്ന് മുംബയിൽ ഇന്ന് റെഡ് അലെർട്ട് പ്രഖ്യാപിച്ചു. അടുത്ത നാല് ദിവസത്തേക്ക് യെല്ലോ അലർട്ടും പ്രഖ്യാപിച്ചിട്ടുണ്ട്. കൊങ്കൺ കിനാർപറ്റി, മുംബയ് എന്നിവിടങ്ങളിൽ ഇന്നലെ കനത്ത മഴയുണ്ടായി. അടുത്ത മൂന്ന് ദിവസവും കനത്ത മഴയാണ് പ്രതീക്ഷിക്കുന്നതെന്ന് കാലാവസ്ഥ വിഭാഗം അറിയിച്ചു.

മഹാരാഷ്ട്ര മുഖ്യമന്ത്രി ഉദ്ധവ് താക്കറെ മുംബയ് മുനിസിപ്പൽ കോർപ്പറേഷനിലെ ദുരന്തനിവാരണ സേനയുടെ കൺട്രോൾ റൂം സന്ദർശിച്ച് സ്ഥിതിഗതികൾ വിലയിരുത്തി. മഴയും വെള്ളക്കെട്ടും കാരണം ലോക്കൽ ട്രെയിൻ സർവീസുകൾ നിറുത്തിവച്ചു.
കനത്ത മഴയെ തുടർന്ന് മുംബയ് നഗരത്തിലെ മിക്ക ഭാഗങ്ങളിലും വെള്ളക്കെട്ട് രൂപപ്പെട്ടിട്ടുണ്ട്. പൊതുസ്ഥലങ്ങളിലെ വെള്ളം പമ്പ് ചെയ്ത് നീക്കാനുള്ള നടപടികളും പുരോഗമിക്കുന്നുണ്ട്.

തെലങ്കാന, ആന്ധാപ്രദേശ്, ഒഡിഷ, പശ്ചിമ ബംഗാൾ എന്നീ സംസ്ഥാനങ്ങളിലും കനത്ത മഴ ഉണ്ടായേക്കാമെന്നാണ് പ്രവചനം.