പാലക്കാട്: പത്ത് വർഷം പ്രണയിനിയായ അയൽക്കാരിയെ മാതാപിതാക്കൾ പോലും അറിയാതെ സ്വന്തം മുറിയിൽ ഒളിപ്പിച്ചു താമസിപ്പിക്കുക, കേൾക്കുമ്പോൾ അവിശ്വസനീയമെന്ന് തോന്നുമെങ്കിലും റഹ്മാന്റെയും സജിതയുടെയും ജീവിതം ഈയടുത്തകാലം വരെ ഇങ്ങനെയായിരുന്നു.

എന്തിനായിരുന്നു ഈ സാഹസം എന്ന് ചോദിക്കുന്നവരോട് റഹ്മാന് പറയാനുള്ളത് ഇത്രമാത്രം. 'ഇവളെ ഉപേക്ഷിക്കാൻ എനിക്കുമനസു വന്നില്ല, എന്നെ വിട്ടുപോകാൻ ഇവളും തയ്യാറായില്ല'- എന്നാണ് യുവാവിന്റെ മറുപടി.'ഈയടുത്ത് വീട്ടിൽനിന്ന് മര്യാദയ്ക്ക് ഭക്ഷണംപോലും കിട്ടാതായതോടെയാണ് വാടകവീട്ടിലേക്ക് മാറിയതെന്നും റഹ്മാൻ വ്യക്തമാക്കി.

മുൻപ് താൻ ജോലിക്ക് പോകുന്നതിനിടെ ഭക്ഷണം വാങ്ങി കൊണ്ടുവന്നാണ് ഇവൾക്ക് നൽകിയിരുന്നത്. എന്നാൽ അടുത്ത കാലത്തായി ചോറ് മാത്രം കഴിച്ചാണ് ജീവിച്ചത്. വീട്ടുകാർ എനിക്ക് കറികളൊന്നും തന്നിരുന്നില്ലെന്ന് റഹ്മാൻ പറയുന്നു.സാഹചര്യം കൊണ്ടാണ് ഇത്രയും കാലം ഇങ്ങനെ ജീവിക്കേണ്ടി വന്നതെന്നാണ് സജിതയുടെ പ്രതികരണം.