ലണ്ടൻ: കൊവിഡിന്റെ പിടിയിലകപ്പെടാതെ സുരക്ഷിതമായി താമസിക്കാൻ സാധിക്കുന്ന ചില രാജ്യങ്ങളുണ്ട്. പ്രസ്തുത രാജ്യങ്ങളുടെ പട്ടിക പുറത്തുവിട്ടിരിക്കുകയാണ് ലണ്ടൻ ആസ്ഥാനമായുള്ള ഇക്കണോമിസ്റ്റ് ഇന്റലിജൻസ് യൂണിറ്റിന്റെ സർവേ. 2021ൽ താമസിക്കാൻ ഏറ്റവും അനുയോജ്യമായ നഗരം ന്യൂസിലൻഡിലെ ഓക്ക്‌ലൻഡ് ആണെന്ന് സർവേയിൽ ഇവർ കണ്ടെത്തി. ന്യൂസിലൻഡിലെ വെല്ലിംഗ്ടൺ ആണ് നാലാമത്. കൊവിഡിനെതിരെ ശക്തമായ നടപടികളാണ് ന്യൂസിലൻഡ് സ്വീകരിച്ചത്. വൈറസിനെ പിടിച്ചു കെട്ടിയ രാജ്യത്ത്, പൗരന്മാർക്ക് കൂടുതൽ സ്വാതന്ത്ര്യം അനുവദിക്കാനും കഴിഞ്ഞിട്ടുണ്ട്. 2018, 2019 വർഷങ്ങളിൽ നടന്ന സർവേയിൽ ആസ്ട്രിയയിലെ വിയന്നയായിരുന്നു ഒന്നാമത്. എന്നാൽ കൊവിഡ് സാരമായി ബാധിച്ചതിനാൽ ആദ്യ പത്തിൽ ഇടം നേടാൻ പോലും ആസ്ട്രിയയ്ക്ക് സാധിച്ചില്ല. 2020ൽ സർവേ നടത്തിയിട്ടില്ല.
ജപ്പാനിലെ ഒസാക്കയാണ് രണ്ടാമത്. 2019ൽ ഒസാക നാലാം സ്ഥാനത്തായിരുന്നു. ആസ്ട്രേലിയയിലെ അഡ്‌ലെയ്ഡ് മൂന്നാം സ്ഥാനവും പെർത്ത് ആറാം സ്ഥാനത്തും ബ്രിസ്ബേൻ പത്താം സ്ഥാനത്തുമാണ്. സ്വിറ്റ്സർലൻഡിലെ ജനീവക്കൊപ്പം മെൽബൺ എട്ടാം റാങ്ക് പങ്കിടുന്നു.
ടോക്കിയോ (അഞ്ച്), സൂറിച്ച് (ഏഴ്) എന്നിവയാണ് ആദ്യ പത്തിൽ ഇടംപിടിച്ച മറ്റു നഗരങ്ങൾ.
ഇവിടെ സുഖമായി താമസിക്കാം
1. ഓക്ക്‌ലൻഡ്, 2. ഒസാക്ക, 3. അഡ്‌ലെയ്ഡ് 4. വെല്ലിംഗ്ടൺ, 5. ടോക്കിയോ
ഇവിടെ ഇച്ചിരി ബുദ്ധിമുട്ടാ
കാരക്കാസ് (വെനിസ്വല), ദൗആല (കാമറൂൺ), ഹരാരെ (സിംബാബ്വെ), കറാച്ചി (പാകിസ്ഥാൻ), ട്രിപ്പോളി (ലിബിയ), അൾജിയേഴ്സ് (അൾജീരിയ), ധാക്ക (ബംഗ്ലാദേശ്), പോർട്ട് മോഴ്സ്ബി (പാപുവ ന്യൂ ഗിനിയ), ലാഗോസ് (നൈജീരിയ), ഡമാസ്കസ് (സിറിയ)
സ്ഥിരത, സംസ്കാരം, പരിസ്ഥിതി, വിദ്യാഭ്യാസം, ആരോഗ്യ സംരക്ഷണം, അടിസ്ഥാന സൗകര്യങ്ങൾ എന്നിവയാണ് പഠനത്തിന് ആധാരമാക്കിയത്.