തിരുവനന്തപുരം: ജനങ്ങളിൽ നിന്ന് അകന്നുനിൽക്കുന്ന പാർട്ടിയെ അധികാരത്തിൽ തിരിച്ചെത്തിക്കുക എന്ന വലിയ ദൗത്യമാണ് തനിക്ക് മുന്നിലുള്ളത് കെ പി സി സി അദ്ധ്യക്ഷനായി ചുമതലയേൽക്കുന്ന കെ സുധാകരൻ. ജംബോ കമ്മിറ്റികൾ ഇല്ലാതാക്കുകയാണ് പ്രധാന ലക്ഷ്യമെന്നും അദ്ദേഹം കൂട്ടിച്ചേർത്തു.

പുതിയ നേതൃത്വത്തിൽ ഉമ്മൻചാണ്ടിക്കും രമേശ് ചെന്നിത്തലയ്ക്കും അതൃപ്തിയുള്ളതായി തോന്നുന്നില്ലെന്നും, പ്രശ്നങ്ങളുണ്ടെങ്കിൽ അത് ഉയർന്നുവരുമ്പോൾ ചർച്ച ചെയ്ത് പരിഹരിക്കുമെന്നും സുധാകരൻ വ്യക്തമാക്കി. ഒരു മാദ്ധ്യമത്തിന് നൽകിയ അഭിമുഖത്തിൽ സംസാരിക്കുകയായിരുന്നു അദ്ദേഹം.

ഇന്ന് രാവിലെ 11നും 11.30നും മദ്ധ്യേ ഇന്ദിരാഭവനിൽവച്ചാണ് കെ സുധാകരൻ കെ പി സി സി അദ്ധ്യക്ഷനായി സ്ഥാനമേൽക്കുക. പുതിയ വർക്കിംഗ് പ്രസിഡന്റുമാരായ കൊടിക്കുന്നിൽ സുരേഷ് എം.പി, പി.ടി. തോമസ് എം.എൽ.എ, ടി. സിദ്ദിഖ് എം.എൽ.എ എന്നിവരും ഇന്ന് ചുമതലയേൽക്കും.

രാവിലെ പത്ത് മണിയോടെ കിഴക്കേകോട്ടയിലെ ഗാന്ധി പ്രതിമയിൽ സുധാകരൻ ഹാരാർപ്പണം നടത്തും. അതിനുശേഷം പാളയം രക്തസാക്ഷി മണ്ഡപത്തിൽ പുഷ്പാർച്ചനയും നടത്തും. കെ.പി.സി.സി ഓഫീസിൽ സേവാദൾ വോളണ്ടിയർമാരുടെ ഗാർഡ് ഒഫ് ഓണർ സ്വീകരിക്കും.