തിരുവനന്തപുരം: ഈ മാസം 30 ന് സർവീസ് ജീവിതത്തിൽ നിന്നും വിരമിക്കുന്ന സംസ്ഥാന പൊലീസ് മേധാവി ലോക്‌നാഥ് ബെഹ്‌റ ഐ പി എസിന് പൊലീസ് ആസ്ഥാനത്തുവച്ച് പൊലീസ് കേഡറ്റുകൾ ഗാർഡ് ഒഫ് ഓണർ നൽകി. കൊവിഡ് മാനദണ്ഡങ്ങൾ പാലിച്ചുകൊണ്ട് രാവിലെ 10.30നായിരുന്നു ചടങ്ങ് സംഘടിപ്പിച്ചത്.

മെഡിക്കൽ കോളേജ് ഗവൺമെന്റ് ഹയർ സെക്കൻഡറി സ്‌കൂൾ,എസ് എം വി ബോയ്‌സ് ഹയർ സെക്കൻഡറി സ്‌കൂൾ എന്നിവിടങ്ങളിലെ കേഡറ്റുകൾ ആയിരുന്നു ഗാർഡ് ഒഫ് ഓണർ നൽകിയത്. കേഡറ്റുകൾ സംസ്ഥാന പൊലീസ് മേധാവിക്ക് ഉപഹാരങ്ങൾ നൽകി.

പൊലീസ് ആസ്ഥാനത്തെ ഹെഡ് കോട്ടേഴ്‌സ് എഡിജിപി മനോജ് എബ്രഹാം ഐപിഎസ്,സിറ്റി പൊലീസ് കമ്മിഷണർ ബൽറാം കുമാർ ഉപാധ്യായ ഐപിഎസ്, എ ഐജി ഹരിശങ്കർ ഐപിഎസ് തുടങ്ങിയ മുതിർന്ന പൊലീസ് ഉദ്യോഗസ്ഥർ ചടങ്ങിൽ പങ്കെടുത്തു.