കാഠ്മണ്ഡു: യോഗയുടെ ഉത്ഭവം ഇന്ത്യയിലല്ല, നേപ്പാളിലാണെന്ന അവകാശവാദവുമായി പ്രധാനമന്ത്രി കെ.പി. ശർമ ഒലി. അന്താരാഷ്ട്ര യോഗാ ദിനത്തോടനുബന്ധിച്ചായിരുന്നു ഒലിയുടെ വിവാദ പ്രസ്താവന. ഇത് കൂടാതെ, ശ്രീരാമൻ ജനിച്ചത് നേപ്പാളിലാണെന്ന പ്രസ്താവന ഒലി ആവർത്തിച്ചു

ഇന്ത്യ എന്ന രാജ്യം നിലവിൽ വരുന്നതിന് മുമ്പുതന്നെ നേപ്പാളിൽ ആളുകൾ യോഗ ചെയ്തിരുന്നു. യോഗയുടെ ഉത്ഭവം ഇന്ത്യയിലല്ല. ഇന്ത്യ നിരവധി നാട്ടുരാജ്യങ്ങളായിരുന്ന കാലത്തുതന്നെ നേപ്പാൾ ജനത യോഗ ചെയ്തിരുന്നു. യോഗയുടെ ഉത്ഭവം നേപ്പാളിലോ ഉത്തരാഖണ്ഡിന് സമീപത്തോ ആണ്. യോഗ കണ്ടെത്തിയ ഋഷിമാര്‍ക്ക് നാം ആദരവ് നല്‍കിയിട്ടില്ല. എന്നാൽ, ഇക്കാര്യം പ്രൊഫസർമാർ അടക്കമുള്ളവരുമായി സംസാരിച്ചിട്ടുണ്ട്.

യോഗയുടെ കാര്യത്തിൽ ശരിയായ രീതിയിൽ അവകാശവാദം ഉന്നയിക്കാൻ നമുക്ക് കഴിഞ്ഞിട്ടില്ല. യോഗയെ അന്താരാഷ്ട്ര തലത്തില്‍ എത്തിക്കാനും നമുക്ക് സാധിച്ചില്ല. ഇന്ത്യൻ പ്രധാനമന്ത്രി നരേന്ദ്ര മോദിയാണ് യോഗയ്ക്ക് അന്താരാഷ്ട്ര പ്രശസ്തി നല്‍കിയത്. യോഗാ ദിനം ആഘോഷിച്ചു തുടങ്ങിയതോടെയാണ് അത് സാധ്യമായതെന്നും ഒലി കൂട്ടിച്ചേർത്തു.