ലക്‌നൗ: ഉത്തർപ്രദേശ് ലക്‌നൗവിൽ നിന്ന്​ 130 കിലോമീറ്റർ അകലെ ഖേരി ജില്ലയിൽ​ എട്ടുവയസുകാരിയെ പീഡിപ്പിച്ച് ശ്വാസം മുട്ടിച്ച്​ ​കൊലപ്പെടുത്തിയ നിലയിൽ കരിമ്പ് പാടത്ത് നിന്ന് കണ്ടെത്തി.

മൃതദേഹം കണ്ടെത്തുന്നതിന് മണിക്കൂറുകൾക്ക് മുമ്പാണ് പെൺകുട്ടിയെ കാണാതായത്. കുട്ടിയുടെ ശരീരത്തിൽ പരിക്കേറ്റിട്ടുണ്ടായിരുന്നു. പോക്​സോ വകുപ്പുകൾ ചുമത്തി കേസ്​ രജിസ്​റ്റർ ചെയ്​തതായി പൊലീസ്​ പറഞ്ഞു.

പെൺകുട്ടി ധരിച്ചിരുന്ന വസ്​ത്രം ഉപയോഗിച്ചാണ്​ കഴുത്തിൽ കുരുക്ക്​ മുറുക്കിയിരിക്കുന്നത്.

ഞായറാഴ്ച രാവിലെ മുത്തശിക്കൊപ്പം ആടിനെ മേയ്​ക്കാൻ വയലിൽ പോയതായിരുന്നു​ പെൺകുട്ടി. എന്നാൽ ക്ഷീണം തോന്നിയതിനാൽ പെൺകുട്ടി വീട്ടിലേക്ക്​ മടങ്ങി. മുത്തശി വയലിൽ തുടർന്നു.

മണിക്കൂറുകൾക്ക് ശേഷം ആടുകളുമായി മുത്തശി വീട്ടിൽ തിരി​ച്ചെത്തിയപ്പോഴാണ്​ എട്ടുവയസുകാരിയെ കാണാനില്ലെന്ന് മനസിലാക്കുന്നത്. തൊട്ടടുത്ത വീട്ടിലെ വിവാഹത്തിൽ പങ്കെടുക്കാൻ പോയെന്നാണ്​ ആദ്യം കരുതിയത്​. അവിടെ എത്തിയില്ലെന്ന് വ്യക്തമായതോടെ കുടുംബവും നാട്ടുകാരും പെൺകുട്ടിയെ അന്വേഷിച്ചിറങ്ങി. തുടർന്നാണ് പ്രദേശത്തെ വയലിൽനിന്ന് പെൺകുട്ടിയുടെ മൃതദേഹം കണ്ടെടുത്തത്.

'അവളുടെ കാലുകൾ കൂട്ടിക്കെട്ടിയ നിലയിലായിരുന്നു. അവിടെ മുഴുവൻ രക്തം പടർന്നിരുന്നു.' -പെൺകുട്ടിയുടെ മുത്തശി പറഞ്ഞു.

കുടിയേറ്റ തൊഴിലാളിയാണ് പെൺകുട്ടിയുടെ പിതാവ്. മൂന്നു മക്കളിൽ മൂത്ത പെൺകുട്ടിയാണ്​ എട്ടുവയസുകാരി.

എട്ടു ഡോക്​ടർമാരുടെ നേതൃത്വത്തിൽ പെൺകുട്ടിയുടെ പോസ്റ്റു​മോർട്ടം നടത്തി. പെൺകുട്ടി ബലാത്സംഗത്തിന്​ ഇരയായതായി ഡോക്ടർമാർ ഇതുവരെ സ്ഥിരീകരിച്ചിട്ടില്ല. പെൺകുട്ടിയുടെ ശരീരത്തിലെ പാടുകളുടെ അടിസ്ഥാനത്തിൽ തങ്ങൾ പോക്​സോ കേസ്​ രജിസ്റ്റർ ചെയ്യുകയായിരുന്നുവെന്ന്​ പൊലീസ്​ മേധാവി പറഞ്ഞു.