റായ്​പൂർ: ഛത്തീസ്‌ഗഡിലെ ദന്ദേവാഡ ജില്ലയിൽ നടന്ന ഏറ്റുമുട്ടലിൽ 25 ക്രിമിനൽ കേസുകളിൽ പ്രതിയായ മാവോയിസ്റ്റിനെ സുരക്ഷാ സേന വധിച്ചു. പൊലീസ് തലയ്ക്ക് അഞ്ച് ലക്ഷം രൂപ വിലയിട്ട സന്തോഷ്​ മാർഗത്തെയാണ് വധിച്ചത്.

പോർഡമിലുള്ള വനത്തിൽ ഇന്നലെ ഉച്ചക്ക്​ 12.30നാണ്​ ഏറ്റുമുട്ടൽ നടന്നത്. ഡിസ്​ട്രിക്​ റിസർവ്​ ഗ്രൂപ്പിന്റെ ഒരു സംഘം നടത്തിയ ഓപ്പറേഷനിടെ മാവോയിസ്റ്റുകൾ വെടിവയ്ക്കുകയായിരുന്നുവെന്നും ഇതേത്തുടർന്നാണ്​ പ്രത്യാക്രമണം നടത്തിയതെന്നും പൊലീസ്​ പറഞ്ഞു.

പിന്നാലെ മാവോയിസ്റ്റുകൾ ഉൾവനത്തിലേക്ക്​ രക്ഷപെട്ടു.പ്രദേശത്ത്​ നടത്തിയ തെരച്ചിലിലാണ്​ തോക്കുമായി കിടക്കുന്ന നക്​സലിന്റെ മൃതദേഹം കണ്ടെത്തിയത്​.