ഹൈദരാബാദ്: തെലങ്കാന പി.സി.സി ഭാരവാഹികളെ എ.ഐ.സി.സി പ്രഖ്യാപിച്ചു.രേവന്ത് റെഡ്ഡി എം.പിയാണ് കോൺഗ്രസ് പ്രസിഡന്റ്. 2019ൽ ഹുസൂർ നഗറിലുണ്ടായ ഉപതിരഞ്ഞെടുപ്പിലെ പരാജയത്തിന് പിന്നാലെ ഉത്തം കുമാർ റെഡ്ഡി രാജിവച്ച ഒഴിവിലേക്കാണ് രേവന്തിന്റെ നിയമനം.മാരത്തോൺ ചർച്ചകൾക്ക് ശേഷം എല്ലാ വിഭാഗങ്ങൾക്കും പ്രാതിനിദ്ധ്യം നൽകിയാണ് പുതിയ കമ്മറ്റിയെ എ.ഐ.സി.സി നിയമിച്ചിരിക്കുന്നത്.
മുൻ ഇന്ത്യൻ ക്രിക്കറ്റ് ടീം നായകൻ മുഹമ്മദ് അസറുദ്ദീൻ, ഗീത റെഡ്ഡി, അഞ്ജൻ കുമാർ യാദവ്, ടി. ജഗ റെഡ്ഡി, മഹേഷ് കുമാർ ഗൗഡ എന്നിവരാണ് പുതിയ വർക്കിംഗ് പ്രസിഡന്റുമാ‌ർ. പുതിയ കമ്മറ്റിയെ കോൺഗ്രസ് നേതാവ് രാഹുൽ ഗാന്ധിയുടെ പ്രത്യേക താൽപര്യപ്രകാരമാണ് നിയമിച്ചിരിക്കുന്നത്.
തെലങ്കാനയിൽ ശക്തമായ സ്വാധീനമുള്ള റെഡ്ഡി വിഭാഗത്തിൽ നിന്ന് അദ്ധ്യക്ഷനെ നിയമിക്കുന്ന പതിവ് ഇക്കുറിയും കോൺഗ്രസ് തെറ്റിച്ചിട്ടില്ല. നിലവിലെ ഭരണത്തിൽ റെഡ്ഡികൾ അസംതൃപ്തരാണെന്ന് നേരത്തെ റിപ്പോർട്ടുകൾ പുറത്തുവന്നിരുന്നു.