മനില: വാക്സിനേഷനെടുക്കാൻ വിസ്സമതിക്കുന്നവർക്കെതിരെ ഭീഷണിയുമായി ഫിലിപ്പൈൻസ്​ പ്രസിഡന്റ്​ റോഡ്രിഗോ ദുതർതേ. വാക്​സിൻ സ്വീകരിക്കാത്തവരെ ജയിലിലടക്കുമെന്നും ഇവ​ർക്ക്​ ബലമായി വാക്​സിൻ കുത്തിവയ്ക്കുമെന്നും വാക്​സിനെടുക്കാൻ താൽപര്യമില്ലാത്തവർ രാജ്യം വിട്ട്​ പോകണമെന്നും അദ്ദേഹം ആവശ്യപ്പെട്ടു. രാജ്യ​ത്തെ വാക്​സിനേഷൻ മന്ദഗതിയിലായതിന്​ പിന്നാലെയാണിത്.

വാക്​സിൻ എടുത്തോളൂ, അല്ലെങ്കിൽ ജയിലിലാകും. ഇന്ത്യയിലേക്കോ അ​മേരിക്കയിലേക്കോ പോയ‌്‌ക്കോളൂ. നിങ്ങൾ ഒരു മനുഷ്യനാണെങ്കിൽ വൈറസ്​ വാഹകനാകാൻ സാധിക്കും. അത്​ കൊണ്ട്​ വാക്​സിൻ എടുക്കുക - വാർത്താ സമ്മേളനത്തിൽ ദുതർതേ വ്യക്തമാക്കി.

അല്ലെങ്കിൽ ഗ്രാമത്തലവന്മാരിൽ നിന്ന് വാക്​നേഷന് വിധേയരാകാൻ വിസമ്മതിക്കുന്നവരുടെ പട്ടിക വാങ്ങി അവർക്ക്​ പന്നികൾക്ക്​ കുത്തിവയ്ക്കുന്ന ഇവർമെക്​ടിൻ കുത്തിവയ്ക്കുമെന്നും അദ്ദേഹം പറഞ്ഞു. കൊവിഡിനെ നേരിടാൻ കഠിനമായ നിലപാടുകൾ സ്വീകരിക്കുന്ന ദുതർതേ വ്യാപക വിമർശനം നേരിടുന്നുണ്ട്.

ഫിലിപ്പൈൻസിൽ വാക്സിൻ സ്വീകരിച്ചവരുടെ എണ്ണം വളരെ കുറവാണ്.

വാക്​സിൻ സ്വീകരിക്കാനെത്തുന്നവരുടെ എണ്ണം കുറഞ്ഞതോടെ രാജ്യത്ത്​ രജിസ്​ട്രേഷൻ നിറുത്തിയിരിക്കുകയാണ്​.കഴിഞ്ഞദിവസം 28,000 പേർക്ക്​ വാക്​സിനേഷന്​ അറിയിപ്പ്​ നൽകിയിട്ടും എത്തിയത് 4,402 പേർ മാത്രമാണ്​ ​.

ജൂൺ 20 വരെ 21 ലക്ഷം ആളുകൾ രാജ്യത്ത് വാക്സിനേഷന്​ വിധേയമായെന്നാണ് റിപ്പോർട്ടുകൾ​. ഈ വർഷം തന്നെ രാജ്യത്തെ ഏഴ്​ കോടിയാളുകൾക്കും വാക്​സിൻ നൽകാനാണ്​ സർക്കാർ ലക്ഷ്യമിടുന്നത്. ഡെൽറ്റ വകഭേദത്തെ തടയാൻ ഫിലിപ്പൈൻസ് അതിർത്തികൾ അടച്ചിട്ടിരിക്കുകയാണ്.