ലോകമെമ്പാടുമുള്ള മനുഷ്യരെ വീട്ടിലിരുന്ന് ജോലിചെയ്യാൻ നിർബന്ധിതരാക്കിയ മഹാസംഭവമാണ് കൊവിഡും അതിനെത്തുടർന്നുണ്ടായ ലോക്ക് ഡൗണും.

വീട്ടിലെ ഓഫീസ് ഒരു കാലത്ത് ആഡംബരമായിരുന്നുവെങ്കിൽ ഇന്ന് അത്

ഒരു സാധാരണ മാനദണ്ഡം മാത്രമാണ്. ലോക്ക് ഡൗൺ നീണ്ടുപോയതോടെ ഡൈനിംഗ് റൂമുകളെ ഓഫീസ് ക്യുബിക്കുകളായും അടുക്കളയെ കാന്റീനായും പരിവർത്തനം ചെയ്തു. കൂടാതെ വീട്ടിലെ കട്ടിലും സോഫയും ഡൈനിംഗ്‌ടേബിളും കൊണ്ട് ഓഫീസിടങ്ങൾ സൃഷ്ടിച്ചു.

വീട്ടിലെ ഈ ഇടങ്ങളും ഫർണിച്ചറുകളുമൊന്നും ഒരിക്കലും നീണ്ട മീറ്റിംഗുകൾക്കായി രൂപകൽപ്പന ചെയ്തിട്ടുള്ളവയല്ല. പലപ്പോഴും ജോലിക്കായി തിരഞ്ഞെടുക്കുന്ന ഡൈനിംഗ് ടേബിളിന് ഉയരം കൂടുതലായിരിക്കും.മിക്ക ഡൈനിംഗ് ടേബിൾ കസേരകളിലും ഹാൻഡ് റെസ്റ്റുകൾ ഉണ്ടാവില്ല. അഥവാ ഉണ്ടെങ്കിൽത്തന്നെ അത് ഇത്തരത്തിലുള്ള ജോലികൾക്ക് ഉചിതമായവയല്ല. അതിനാൽ, ഡൈനിംഗ് ടേബിളിൽ ജോലിചെയ്യുമ്പോൾ കൈമുട്ട് ശരീരത്തിൽ നിന്ന് അകലെ വയ്ക്കേണ്ടിവരുന്നു. അതുകൊണ്ട് തോളിലെ പേശികളിൽ സമ്മർദ്ദം ഉണ്ടാകുന്നു. കിടക്കയിലിരുന്നോ സോഫയിലിരുന്നോ ജോലി ചെയ്യുന്നത് നമുക്ക് പ്രലോഭനകരമായിരിക്കാം. പക്ഷേ ഇത് ഒരു മോശം പ്രവണതയാണ്. കാരണം, ഇത് നമ്മുടെ നടുവിന് തീരെ താങ്ങ് നൽകുന്നില്ല. ഒരു കിടക്കയുടെയോ സോഫയുടെയോ രൂപകൽപ്പന, അതിലിരിക്കുന്ന വ്യക്തിയെ കുറച്ചു നേരം കഴിയുമ്പോൾ മുന്നോട്ടു കൂനി ഇരിക്കാൻ പ്രേരിപ്പിക്കുന്നു.

ലോക്ക്ഡൗണിനെ തുടർന്ന് വർക്ക് ഫ്രം ഹോം വിഭാഗത്തിൽ നിന്നുള്ള അനേകം വ്യക്തികൾ തോൾ വേദന, കഴുത്ത് വേദന അല്ലെങ്കിൽ നടുവേദന തുടങ്ങിയ ബുദ്ധിമുട്ടികളുമായി ഓർത്തോപീഡിക് വിഭാഗത്തിൽ വരുന്നുണ്ട്. ബന്ധപ്പെട്ട ജോലികൾക്ക് ആവശ്യമായ രീതിയിൽ ശരീരത്തിന്റെ നിശ്ചിത നില നിലനിർത്താനുള്ള പേശികളുടെ കഴിവില്ലായ്മയിൽ നിന്നാണ് ഈ പ്രശ്നങ്ങൾ ഉണ്ടാകുന്നത്.

എർഗേണോമിക്സ് എന്നാൽ?

ഒരു വ്യക്തയുടെ തൊഴിൽ അന്തരീക്ഷത്തെ പറ്റി പഠിക്കുന്ന ഒരു ശാസ്ത്രമാണ് എർഗേണോമിക്സ്. കുറച്ചുകൂടി വ്യക്തമായി പറഞ്ഞാൽ, ജോലിചെയ്യുന്ന ആൾക്ക് അയാളുടെ തൊഴിൽ ശരീരത്തിന് യോജിക്കുന്ന രീതിയിൽ രൂപകൽപ്പന ചെയ്യുകയോ പരിഷ്‌കരിക്കുകയോ ചെയ്യുക എന്നാണ്. ജോലി കാരണമുണ്ടാകുന്ന അസ്വസ്ഥതയും പരിക്കിന്റെ സാദ്ധ്യതയും ഇല്ലാതാക്കുകയാണ് ഈ ശാസ്ത്രത്തിന്റെ ലക്ഷ്യം. നടുവിനുണ്ടാകുന്ന ഡിസ്‌ക് പ്രൊലാപ്സ് , റെന്റിനിറ്റീസ്, റെട്ടേറ്റർ കഫീനുണ്ടാകുന്ന പരിക്കുകൾ, എപ്പികോണ്ടിലൈറ്റിസ്, പേശികളിലുണ്ടാകുന്ന ക്ലേശങ്ങൾ തുടങ്ങിയ രോഗങ്ങൾ ഇതിലുള്ള ശ്രദ്ധക്കുറവ് കൊണ്ട് ഉണ്ടാവാം.

വീടിനെ എങ്ങനെ

ജോലിസ്ഥലമാക്കി മാറ്റാം

നമ്മുടെ വീടുകളെ എർഗേണോമിക്കലി ഫിറ്റ് ആക്കുന്നതിനുള്ള ആദ്യപടി ജോലിയുടെ സ്വഭാവം മനസിലാക്കുക എന്നതാണ്. നമ്മുടെ ജോലിയുടെ സ്വഭാവത്തെ അനുസരിച്ച് വീട്ടിലെ ജോലി സ്ഥലത്തു അനിവാര്യമായ മാറ്റങ്ങൾ വരുത്താം.

ശരാശരി ഡെസ്‌കിന്റെ ഉയരം 25 മുതൽ 30 ഇഞ്ച് വരെയാണ്. ഇത് നിങ്ങളുടെ ഉയരത്തെ ആശ്രയിച്ച് വളരെ ഉയർന്നതോ ഉയരം കുറഞ്ഞതോ ആകാം.

അതിനാൽ സുഖകരമായി ഇരിക്കാൻ നിങ്ങൾക്ക് ഉയരം ക്രമീകരിക്കാവുന്ന കസേര ആവശ്യമാണ്. നിങ്ങളുടെ കസേരയുടെ ഉയരം ക്രമീകരിക്കുമ്പോൾ, നിങ്ങളുടെ കൈമുട്ട് 90 ഡിഗ്രിയിൽ ആണ് മടങ്ങിയിരിക്കുന്നത് എന്ന് ഉറപ്പുവരുത്തുക. നിങ്ങളുടെ പാദങ്ങൾ തറയിൽ തൊടുന്നില്ലെങ്കിൽ ഒരു ഫുട് സ്റ്റൂൾ ഉപയോഗിക്കുക. കമ്പ്യൂട്ടറിന്റെ മോണിറ്റർ ഒരു കൈ അകലത്തിൽ വേണം വയ്ക്കാൻ. സ്‌ക്രീനിന്റെ മുകൾഭാഗം കണ്ണിന്റെ തലത്തിലായിരിക്കണം. കസേരയ്ക്ക് മതിയായ ബാക്ക് സപ്പോർട്ടും ഹാൻഡ് റെസ്റ്റും ഉണ്ടായിരിക്കണം.

നിങ്ങളുടെ ജോലിക്കായി ശരിയായ രീതിയിൽ ഡെസ്‌ക്ക് സജ്ജമാക്കുന്നതിലൂടെ നേരത്തെ പറഞ്ഞ രോഗങ്ങളെ തടയാൻ സാധിക്കും. തോൾ വേദനയുള്ള ആളുകൾ ദീർഘനേരം ജോലിചെയ്യുമ്പോൾ കൈമുട്ടുകൾ ശരീരത്തോട് ചേർത്തുപിടിച്ച് പ്രവർത്തിക്കാൻ ശ്രമിക്കണം. കൈപ്പത്തിക്ക് വേദനയുള്ള ആളുകൾ കത്രിക പോലുള്ള മറ്റ് ഉപകരണങ്ങൾ ഉപയോഗിക്കുമ്പോൾ പിടിക്കുന്ന രീതി മാറ്റാൻ ശ്രദ്ധിക്കണം. ചില ഉപകരണങ്ങൾ ഉപയോഗിക്കുമ്പോൾ ഇടയ്ക്കു കൈ മാറ്റി ഉപയോഗിക്കാനും ശ്രദ്ധിക്കുക. അത്തരം പ്രശ്നങ്ങൾ അഭിമുഖീകരിക്കുമ്പോൾ ബന്ധപ്പെട്ട പേശികളെ ശക്തിപ്പെടുത്തുന്നത് ഗുണം ചെയ്യും.

ഡോ. അർജുൻ ആർ. പ്രസാദ്

ഓർത്തോപീഡിക് സർജൻ​

എസ്.യു.ടി ആശുപത്രി

പട്ടം,​ തിരുവനന്തപുരം.