മുംബയ്: ന്യുമോണിയ രോഗം കടുത്തതിനെ തുടർന്ന് ബോളിവുഡ് അഭിനേതാവ് നസറുദ്ദീൻ ഷായെ ആശുപത്രിയിൽ പ്രവേശിപ്പിച്ചു. ന്യുമോണിയ കൂടാതെ അദ്ദേഹത്തിന്റെ ശ്വാസകോശത്തിൽ കുറച്ച് പ്രശ്നങ്ങൾ കണ്ടെത്തിയതിനെ തുടർന്ന് അടിയന്തരമായി ആശുപത്രിയിൽ പ്രവേശിപ്പിക്കുകയായിരുന്നുവെന്ന് കുടുംബാംഗങ്ങൾ മാദ്ധ്യമങ്ങളോട് പറഞ്ഞു. ഭാര്യയും മക്കളും അദ്ദേഹത്തിനൊപ്പം ഉണ്ടെന്നും താരം മരുന്നുകളോട് പ്രതികരിച്ചു തുടങ്ങിയെന്നും അദ്ദേഹത്തിന്റെ കുടുംബത്തിനോട് അടുത്ത വൃത്തങ്ങൾ പറഞ്ഞു.

രണ്ട് ദിവസം മുമ്പാണ് നസറുദ്ദീൻ ഷായെ ആശുപത്രിയിൽ പ്രവേശിപ്പിക്കുന്നത്. തുടക്കത്തിൽ ന്യുമോണിയയുടെ ചികിത്സയ്ക്കു വേണ്ടിയാണ് വന്നതെങ്കിലും വിദഗ്ദ്ധ പരിശോധനയിൽ ശ്വാസകോശത്തിൽ ചില പ്രശ്നങ്ങൾ കണ്ടെത്തുകയായിരുന്നുവെന്ന് താരത്തിന്റെ ഒരു ബന്ധു അറിയിച്ചു. ആശുപത്രിയിൽ പ്രവേശിപ്പിച്ച സമയത്തെ അപേക്ഷിച്ച് അദ്ദേഹത്തിന്റെ ആരോഗ്യനില മെച്ചപ്പെട്ടിട്ടുണ്ടെന്നും ഇപ്പോൾ സ്ഥിതി മെച്ചമാണെന്നും ബന്ധു പറഞ്ഞു.

ഇതിനു മുമ്പും പലതവണ നസറുദ്ദീൻ ഷാ ആശുപത്രിയിലാണെന്ന തരത്തിൽ വാർത്തകൾ പരന്നിരുന്നു. അപ്പോഴെല്ലാം അവയെ നിഷേധിച്ചുകൊണ്ട് നസറുദ്ദീൻ ഷാ തന്നെ രംഗത്തു വന്നിരുന്നു.