നടി ശരണ്യയുടെ ഇപ്പോഴത്തെ അവസ്ഥയെക്കുറിച്ച് യൂട്യൂബ് വീഡിയോയിലൂടെ വെളിപ്പെടുത്തി നടി സീമ ജി നായർ. കൊവിഡ് ബാധിച്ചതിന് പിന്നാലെ കഴിഞ്ഞ മാസമാണ് ശരണ്യയെ ആശുപത്രിയിൽ പ്രവേശിപ്പിച്ചത്. ന്യുമോണിയയും ബാധിച്ചു. 36 ദിവസമായി സ്വകാര്യ ആശുപത്രിയിൽ ചികിത്സയിൽ കഴിയുകയാണ് നടി.
' ശരണ്യയെ കൊവിഡ് ബാധിച്ച് കഴിഞ്ഞ മാസം 23ന് തിരുവനന്തപുരത്തെ സ്വകാര്യ ആശുപത്രിയിൽ പ്രവേശിപ്പിച്ചിരുന്നു.ഗുരുതരമായ സാഹചര്യത്തിലേക്ക് പോകുകയും, വെന്റിലേറ്റർ ഐസിയുവിലേക്ക് മാറ്റുകയും ചെയ്തു.വല്ലാത്ത ക്രിട്ടിക്കൽ കണ്ടീഷനായിരുന്നു അപ്പോൾ. ഒരുപാട് ദിവസം വെന്റിലേറ്ററിൽ കിടന്നു. ഈ മാസം പത്തിനാണ് കൊവിഡ് നെഗറ്റീവായത്.റൂമിലേക്ക് കൊണ്ടുവന്നു. അന്നുരാത്രി ഭയങ്കരമായി പനിയുണ്ടായി. വീണ്ടും വെന്റിലേറ്ററിലേക്ക് മാറ്റി.
വായിലൂടെ ശ്വാസം കൊടുക്കുന്നതില്‍ ബുദ്ധിമുട്ടുകളുണ്ടായി. കഫം തുപ്പാന്‍ കഴിയാത്ത അവസ്ഥയായി. അങ്ങനെ ട്രെക്യോസ്റ്റമി ചെയ്തു. ഇപ്പോള്‍ തൊണ്ടയില്‍ കൂടിയാണ് ഓക്‌സിജന്‍ കൊടുക്കുന്നത്. വളരെ സീരിയസായായി ന്യുമോണിയ വന്നു. ഒന്നിനുപിറകെ ഒന്നായി ഗുരുതരമായ എല്ലാ രോഗങ്ങളിലൂടെയും പോയിക്കൊണ്ടിരിക്കുകയായിരുന്നു.
ശ്രീചിത്രയിൽ ചികിത്സ നടന്നപ്പോൾ പൈസയുടെ കാര്യത്തിൽ കുറച്ച് ആശ്വാസമുണ്ടായി. ഇപ്പോൾ സ്വകാര്യ ആശുപത്രിയിൽ കൊണ്ടുപോയപ്പോൾ കൈയിൽ നിക്കാൻ പറ്റാത്ത രീതിയിലുള്ള ചികിത്സാ ചിലവാണ് വന്നിരിക്കുന്നത്. 36 ദിവസം കഴിഞ്ഞു അഡ്മിറ്റ് ചെയ്തിട്ട്.ഊഹിക്കാൻ പറ്റും നമുക്ക് എത്ര ലക്ഷം രൂപ ആ ആശുപത്രിയിലായിട്ടുണ്ടാകുമെന്ന്. അവരെ കുറ്റം പറഞ്ഞിട്ട് കാര്യമില്ല.സിസ്റ്റം അങ്ങനെയാണ്.ബില്ല് വന്നുകൊണ്ടിരിക്കുകയാണ്. കൊടുക്കാൻ പറ്റുന്നതിന്റെ പരമാവധി ചികിത്സ നൽകുകയാണ്.
വില കൂടിയ ആന്റി ബയോട്ടിക്കാണ് കൊടുക്കുന്നത്. ഇപ്പോള്‍ ബെഡ് സോര്‍ വന്നു തുടങ്ങി. ഇത് വന്ന് കഴിഞ്ഞാല്‍ ഉറപ്പായും ഇന്‍ഫെക്ഷന്‍ വരും. രക്തത്തില്‍ ഇന്‍ഫെക്ഷന്‍ ഉണ്ടായിരുന്നു. എന്താണ് പറയേണ്ടതെന്നറിയില്ല. അവള്‍ക്കു വേണ്ടി ഡോക്ടര്‍മാരും പരിശ്രമിക്കുന്നു. വീട്ടിലേക്ക് കൊണ്ടുവന്നാലും ഓക്‌സിജന്‍ സപ്പോര്‍ട്ട് എപ്പോഴും വേണമെന്നാണ് പറയുന്നത്.
ആര്‍.സി.സിയില്‍ കൊണ്ട് പോകാന്‍ പറ്റാത്ത അവസ്ഥയായതിനാൽ ഈ ആശുപത്രിയിൽ ഇന്നലെ കീമോ ആരംഭിച്ചു. തൊണ്ടയില്‍ ട്യൂബ് ഇട്ടിരിക്കുന്നതിനാല്‍ സംസാരിക്കാന്‍ കഴിയില്ല. ശരിക്കും പറഞ്ഞാല്‍ എന്താണ് ചെയ്യേണ്ടതെന്നറിയില്ല. കാല്‍ചുവട്ടിലെ മണ്ണുകള്‍ എല്ലാം ഒലിച്ചു പോവുകയാണ്. എന്താണ് ചെയ്യേണ്ടതെന്ന് അറിയില്ല. എങ്കിലും എല്ലാവരുടെയും പ്രാര്‍ത്ഥന വേണം. ഇത്രയും അസുഖങ്ങള്‍ വന്നിട്ടും കൊവിഡിന് ശേഷവും ജീവിതത്തിലേക്ക് തിരിച്ചു വന്നുകൊണ്ടിരിക്കുകയാണ്. അതും അദ്ഭുതമാണ്. ഇപ്പോഴും ഐ.സി.യുവിലാണ്. ഇതാണ് ശരണ്യയുടെ പുതിയ വിശേഷം. ഇനിയെല്ലാം ഒരു ചോദ്യചിഹ്നമായി നിൽക്കുകയാണ്.എങ്ങനെ മുന്നോട്ട് എന്നെല്ലാം ചോദ്യ ചിഹ്നത്തിലാണ്." -സീമ ജി നായർ പറഞ്ഞു.