തിരുവല്ല: ലോക പരിസ്ഥിതി ദിനത്തിന്റെ ഭാഗമായി ബേർഡ്സ്‌ ക്ലബ്‌ ഇന്റർ നാഷണൽ പത്തനംതിട്ടയുടെ ആഭിമുഖ്യത്തിൽ ഇന്ന് മഴത്തുരുത്ത്‌ പദ്ധതിക്ക്‌ തുടക്കം കുറിക്കും. മെഴുവേലി പഞ്ചായത്തിൽ ഉള്ളന്നൂരിൽ പരിസ്ഥിതി പ്രവർത്തകനായ ശ്രീജേഷ്‌ പിള്ള ഇടയിരേത്തിന്റെ ഭൂമിത്രവനിലാണു മഴത്തുരുത്ത്‌ ചെറുവനങ്ങൾ വളർത്തുന്നത്. ആദ്യഘട്ടമായി 1001 വൃക്ഷത്തൈകൾ നടാനാണ് നിലമൊരുക്കിയിരിക്കുന്നത്‌. ഇന്ന് രാവിലെ 10ന് മഴത്തുരുത്ത്‌ പദ്ധതിയുടെ ജില്ലാതല ഉദ്ഘാടനം ഇക്കോ ഫിലോസഫറും അതിവേഗ ചിത്രകാരനുമായ അഡ്വ.ജിതേഷ്ജി വൃക്ഷത്തൈകൾ നട്ട്‌ നിർവഹിക്കും. വനംവകുപ്പിന്റെയും സോഷ്യൽ ഫോറസ്റ്റ്രി ഡിപ്പാർട്ട്മെന്റിന്റെയും സഹകരണത്തോടെയാണ് സിനിമാ സംവിധായകൻ ജയരാജിന്റെ നേതൃത്വത്തിലുള്ള ഈ സംഘടന പരിസ്ഥിതി പ്രവർത്തനങ്ങൾ നടത്തുന്നത്‌.