പത്തനംതിട്ട : നഗരസഭയിലെ കെട്ടിടങ്ങളുടെ നികുതി അടയ്ക്കുന്നതിനും ഉടമസ്ഥാവകാശ സർട്ടിഫിക്കറ്റുകൾ ലഭിക്കുന്നതിനും ഓൺലൈൻ സേവനം ഇന്നുമുതൽ നിലവിൽ വരും. നഗരസഭയിലെ സേവനങ്ങൾ പൂർണമായും ഓൺലൈൻ ആക്കി മാറ്റുന്നതിനു മുന്നോടിയായാണ് ആദ്യഘട്ട പ്രവർത്തനങ്ങൾക്ക് തുടക്കം കുറിക്കുന്നത്. നഗരസഭ ഓഫീസിൽ നേരിട്ട് എത്താതെ tax.lsgkerala.gov.in എന്ന വെബ്‌സൈറ്റിലൂടെ കെട്ടിട നികുതി വിവരങ്ങൾ മനസിലാക്കുന്നതിനും നികുതി അടയ്ക്കുന്നതിനും ഇതോടെ സൗകര്യം ഒരുങ്ങും. കൂടാതെ ഉടമസ്ഥാവകാശ സർട്ടിഫിക്കറ്റ് അടക്കം കെട്ടിടങ്ങളുമായി ബന്ധപ്പെട്ട് വരുന്ന മറ്റു സർട്ടിഫിക്കറ്റുകൾ ഓൺലൈനായി ലഭിക്കും. ഇത്തരം സേവനങ്ങൾക്കായി നഗരസഭാ കാര്യാലയത്തിൽ എത്തുന്നവർക്കു പലപ്പോഴും ഉദ്യോഗസ്ഥർ അവധിയിൽ ആകുന്നതിനാൽ സേവനം യഥാസമയം ലഭ്യമാകാതെ വരുന്നു. ഈ ബുദ്ധിമുട്ട് സേവനങ്ങൾ ഓൺലൈനാകുന്നതോടെ അവസാനിക്കും. ഇതുമായി ബന്ധപ്പെട്ട സംശയങ്ങൾക്കും പരാതികൾക്കും നഗരസഭ ഏർപ്പെടുത്തിയിട്ടുള്ള ഹെൽപ് ഡെസ്‌ക് നമ്പരുകൾ ബന്ധപ്പെടാവുന്നതാണെന്നും ചെയർമാൻ ടി.സക്കീർ ഹുസൈൻ അറിയിച്ചു. ഹെൽപ് ഡസ്‌ക് നമ്പരുകൾ: വാർഡ് 1 മുതൽ 16 വരെ: 9074158383, 9539565849. വാർഡ് 17 മുതൽ 32 വരെ: 8078232260, 9961622960.