കോന്നി: ഇക്കോ ടൂറിസം പദ്ധതികളുടെ വിപുലീകരണത്തിന് കോന്നിയിൽ മാസ്​റ്റർ പ്ലാൻ തയാറാക്കുന്നു. കഴിഞ്ഞ സംസ്ഥാന ബഡ്ജ​റ്റിൽ പ്രഖ്യാപിച്ച ബയോഡൈവേഴ്‌സി​റ്റി സർക്യൂട്ടിൽ കോന്നി ഇക്കോ ടൂറിസത്തെ ഉൾപ്പെടുത്തിയിരുന്നു. ഇതിന്റെ ഭാഗമായി ധാരാളം വിദേശ സ്വദേശ ടൂറിസ്​റ്റുകൾ കോന്നിയിൽ എത്തിച്ചേരാൻ സാദ്ധ്യതയുണ്ട്. ഈ സാഹചര്യം മുൻനിറുത്തിയാണ് ടൂറിസം രംഗത്ത് പരമാവധി സാദ്ധ്യതകൾ കണ്ടെത്തി പ്രയോജനപ്പെടുത്തുന്നതിനുള്ള മാസ്റ്റർ പ്ളാൻ തയാറാക്കുന്നത്.

ആനക്കൂടിനും അടവിയ്ക്കും പുതുജീവൻ

ആനക്കൂടും, അനുബന്ധ കേന്ദ്രങ്ങളും വികസിപ്പിച്ചുള്ള വിപുലമായ ടൂറിസം സാദ്ധ്യതകളാണ് മാസ്​റ്റർ പ്ലാനിന്റെ ഭാഗമായി തയാറാക്കുന്നത്. തെന്മല ഇക്കോ ടൂറിസത്തിൽ നിന്നുമുള്ള സംഘം മാസ്​റ്റർ പ്ലാൻ തയാറാക്കാനായി കോന്നിയിൽ ഉടൻ എത്തും. ആനക്കൂട്ടിൽ കൂടുതൽ സ്ഥലം ടൂറിസം പ്രവർത്തനങ്ങൾക്കായി മാ​റ്റി വയ്ക്കാൻ കെ.യു. ജനീഷ് കുമാർ എം.എൽ.എയുടെ നേതൃത്വത്തിൽ ചേർന്ന വനം വകുപ്പ് ഉദ്യോഗസ്ഥരുടെ യോഗത്തിൽ തീരുമാനമായിട്ടുണ്ട്. ആനക്കൂടിന്റെ ഭാഗമായി കൂടുതൽ സ്ഥലമെടുത്ത് നടത്തേണ്ട പ്രവർത്തനങ്ങൾ മാസ്​റ്റർ പ്ലാനിന്റെ ഭാഗമായി തയാറാക്കും. ആനക്കൂടിന്റെ പ്രവർത്തന സമയവും വർദ്ധിപ്പിക്കുകയും കൂടുതൽ കാര്യക്ഷമമാക്കുകയും ചെയ്യും. അടവി ഹട്ടും,കുട്ട വഞ്ചി സവാരി കേന്ദ്രവും കൂടുതൽ ആകർഷകമാക്കും. കൂടുതൽ ആളുകൾക്ക് തൊഴിൽ നൽകത്തക്ക നിലയിലുള്ള പ്രവർത്തനങ്ങളാണ് ആവിഷ്‌കരിക്കുക.

സഞ്ചായത്ത് കടവിൽ ബോട്ട് സവാരി

സഞ്ചായത്തു കടവിലെ വനം വകുപ്പ് വക സ്ഥലവും റവന്യൂ പുറമ്പോക്കും ഉപയോഗപ്പെടുത്തി ടൂറിസം പദ്ധതി യാഥാർത്ഥ്യമാക്കും.ഇവിടെ പെഡൽ ബോട്ട് സവാരിയും തുടങ്ങും. ആനക്കൂടിന് എതിർ ഭാഗത്തുള്ള കോട്ടപ്പാറ മലയിലേയും ടൂറിസം സാദ്ധ്യതകൾ പരിശോധിക്കും. കോന്നിയുടെ കാനന സൗന്ദര്യം ആസ്വദിക്കത്തക്ക നിലയിലുള്ള യാത്രകൾ ആനക്കൂട്ടിൽ നിന്നും ആരംഭിക്കും. ഈ യാത്രയ്ക്ക് ടൂറിസം കേന്ദ്രത്തിൽ നിന്ന് വാഹനവും ക്രമീകരിക്കും.

ആനയും, ആനക്കൂടും, അച്ചൻകോവിലാറും, കാനന യാത്രകളും, അടവിയും, നിരവധി പുതിയ കേന്ദ്രങ്ങളും ഉൾപ്പെടുത്തിയുള്ള പ്രകൃതിക്കിണങ്ങുന്ന ടൂറിസം പദ്ധതികളുടെ കേന്ദ്രമായി കോന്നിയെ മാ​റ്റും. ടൂറിസം സർക്യൂട്ടിൽ ഉൾപെട്ടതോടെ വരും വർഷങ്ങളിൽ ധാരാളം വിദേശ സഞ്ചാരികൾ കോന്നിയിൽ എത്തിച്ചേരും. ടൂറിസത്തിന്റെ ഭാഗമായി നിരവധി തൊഴിൽ സാദ്ധ്യതകൾ സൃഷ്ടിക്കാൻ കഴിയും.

കെ.യു. ജനീഷ് കുമാർ

(എം.എൽ.എ)

-നിരവധി തൊഴിൽ സാദ്ധ്യതകൾ