പത്തനംതിട്ട : ജില്ലയിലെ എം.എൽ.എമാരുടെ ആസ്തിവികസന ഫണ്ടിൽ നിന്ന് തുക ചെലവഴിച്ച് എല്ലാ മണ്ഡലങ്ങളിലും സർക്കാർ ആശുപത്രികളിൽ ഐസൊലേഷൻ വാർഡുകൾ നിർമ്മിക്കും. കൊവിഡ് പ്രതിരോധപ്രവർത്തനങ്ങളുടെ ഭാഗമായി എം.എൽ.എമാരുടെ ആസ്തിവികസന ഫണ്ട് ഉപയോഗിച്ച് സംസ്ഥാന സർക്കാർ കേരളം മുഴുവൻ നടപ്പിലാക്കുന്ന പദ്ധതിയാണിത്. ഐസലേഷൻ വാർഡുകൾ നിർമ്മിക്കുന്നത് സംബന്ധിച്ച ജില്ലയിലെ യോഗം ആരോഗ്യമന്ത്രി വീണാ ജോർജിന്റെ അദ്ധ്യക്ഷതയിൽ ഓൺലൈനായി ചേർന്നു. ഡെപ്യൂട്ടി സ്പീക്കർ ചിറ്റയം ഗോപകുമാർ, എം.എൽ.എമാരായ മാത്യു ടി. തോമസ്, അഡ്വ.കെ.യു ജനീഷ്‌കുമാർ, അഡ്വ.പ്രമോദ് നാരായണൻ എന്നിവരും യോഗത്തിൽ പങ്കെടുത്തു.
ജില്ലയിലെ അഞ്ചു നിയോജക മണ്ഡലങ്ങളിലും ഐസലേഷൻ വാർഡുകൾ, അവയ്ക്ക് ആവശ്യമായ ഉപകരണങ്ങളും മറ്റ് അടിസ്ഥാന സൗകര്യങ്ങളും സജ്ജീകരിക്കും.
മണ്ഡലങ്ങളും ഐസൊലേഷൻ വാർഡുകൾ
ഒരുങ്ങുന്ന ആശുപത്രികളും
ആറൻമുള : കോഴഞ്ചേരി ജില്ലാ ആശുപത്രി, പത്തനംതിട്ട ജനറൽ ആശുപത്രി, ഇലന്തൂർ കമ്യൂണിറ്റി ഹെൽത്ത് സെന്റർ, വല്ലന കമ്യൂണിറ്റി ഹെൽത്ത് സെന്റർ.
അടൂർ : അടൂർ ജനറൽ ആശുപത്രി, തുമ്പമൺ കമ്യൂണിറ്റി ഹെൽത്ത് സെന്റർ. തുമ്പമൺ കമ്യൂണിറ്റി ഹെൽത്ത് സെന്ററിൽ പുതിയ കെട്ടിടം നിർമ്മിക്കും. അടൂർ ജനറൽ ആശുപത്രിയിൽ നിലവിലുള്ള കെട്ടിടത്തിലാകും ഐസലേഷൻ വാർഡ് ഒരുക്കുക.
തിരുവല്ല : തിരുവല്ല താലൂക്ക് ആശുപത്രി, കല്ലൂപ്പാറ, ചാത്തങ്കേരി, കുന്നന്താനം എന്നീ സി.എച്ച്.സി.
റാന്നി : വെച്ചൂച്ചിറ, റാന്നി പെരുനാട്, ഐരൂർ കാഞ്ഞീറ്റുകര എന്നീ സി.എച്ച്.സികളിലാണ് ഐസലേഷൻ വാർഡുകൾ നിർമ്മിക്കുക. വെച്ചൂച്ചിറ, റാന്നി പെരുനാട് എന്നീ സി.എച്ച്.സികളിൽ പുതിയ കെട്ടിടം ഇതിനായി നിർമ്മിക്കും.
കോന്നി : കോന്നി താലൂക്ക് ആശുപത്രി, ഏനാദിമംഗലം സി.എച്ച്.സി, പ്രമാടം എഫ്.എച്ച്.സിയിലുമാണ് ഐസലേഷൻ വാർഡ് ഒരുക്കുക. ഇതിൽ ഏനാദിമംഗലം സി.എച്ച്.സി, പ്രമാടം പി.എച്ച്.സി എന്നിവിടങ്ങളിൽ പുതിയ കെട്ടിടത്തിലും കോന്നി താലൂക്ക് ആശുപത്രിയിൽ നിലവിലുള്ള കെട്ടിടത്തിലുമാണ് ഐസലേഷൻ വാർഡ് ഒരുക്കുക.
