കൊല്ലം: അഷ്ടമുടി കായലിൽ ആശുപത്രി മാലിന്യം ഉൾപ്പെടെയുള്ളവ തള്ളുന്നത് പതിവായിട്ടും നടപടിയെടുക്കാത്ത ഉദ്യോഗസ്ഥർക്കെതിരെ സംസ്ഥാന മനുഷ്യാവകാശ കമ്മിഷൻ.

ഇത് സംബന്ധിച്ച് വിശദമായ അന്വേഷണം നടത്തി ജില്ലാ കളക്ടറും മലിനീകരണ നിയന്ത്രണ ബോർഡ് സെക്രട്ടറിയും 15 ദിവസത്തിനകം വിശദീകരണം നൽകണമെന്ന് കമ്മിഷൻ അംഗം വി.കെ. ബീനാകുമാരി ആവശ്യപ്പെട്ടു. പൊതുപ്രവർത്തകനായ അക്ബർ അലി സമർപ്പിച്ച പരാതിയിലാണ് നടപടി.

കരുതലോടെ സംരക്ഷിക്കേണ്ട നീർത്തട പട്ടികയായ റാംസറിൽ ഉൾപ്പെട്ട അഷ്ടമുടി കായലിൽ നടക്കുന്ന പരിസ്ഥിതി മലിനീകരണം ഗൗരവത്തോടെ കാണണമെന്ന് കമ്മിഷൻ ആവശ്യപ്പെട്ടു.