ചാത്തന്നൂർ: സംസ്ഥാന സർക്കാർ തനതായ സാംസ്കാരിക നയം രൂപീകരിച്ച് കലാകാരന്മാരുടെ ഇന്നത്തെ ദുരിതത്തിന് ശാശ്വതപരിഹാരം കാണമെന്ന് നാടക - ചലച്ചിത്ര സംവിധായകൻ പ്രമോദ് പയ്യന്നൂർ ആവശ്യപ്പെട്ടു. പാരിപ്പള്ളി സംസ്കാര സംഘടിപ്പിച്ച സംസ്കാര സ്നേഹസ്പർശം പരിപാടി ഉദ്ഘാടനം ചെയ്യുകയായിരുന്നു അദ്ദേഹം.

സംസ്കാര ഭവനിൽ ചേർന്ന ചടങ്ങിൽ പത്ത് കലാകാരന്മാർക്ക് 5,​000 രൂപ വീതം ധനസഹായം നൽകി. അന്തരിച്ച നടൻ പ്രമോദ് ചാലയുടെ കുടുംബസഹായ ഫണ്ട്, നടൻ കബീർദാസിന്റെ ചികിത്സാ സഹായഫണ്ട് എന്നിവയിലേയ്ക്കും 5,​000 രൂപ വീതം നൽകി. സംസ്കാര പ്രസിഡന്റ് ശിവശങ്കരനുണ്ണിത്താൻ അദ്ധ്യക്ഷത വഹിച്ചു. കല്ലുവാതുക്കൽ പഞ്ചായത്ത് സ്റ്റാൻഡിംഗ് കമ്മിറ്റി ചെയർപേഴ്സൺ എൽ. ശാന്തിനി, സംസ്കാര സെക്രട്ടറി എസ്. പ്രസേനൻ, ട്രഷറർ ഡി. രഞ്ജൻ തുടങ്ങിയവർ പങ്കെടുത്തു.