തൃശൂർ: സംസ്ഥാനത്ത് ആദ്യമായി ട്രാൻസ്‌ജെൻഡർ വിഭാഗത്തിൽപ്പെട്ടവർക്ക് കൊവിഡ് വാക്‌സിനേഷൻ ക്യാമ്പൊരുക്കി. ജില്ലാ കളക്ടർ എസ്. ഷാനവാസിന്റെ പ്രത്യേക നിർദ്ദേശത്തെ തുടർന്ന് ജില്ലാ മെഡിക്കൽ ഓഫീസിന്റെയും ജില്ലാ സാമൂഹ്യനീതി ഓഫീസിന്റെയും സംയുക്താഭിമുഖ്യത്തിലാണ് ക്യാമ്പ് സംഘടിപ്പിച്ചത്. തൃശൂർ ബിഫോർ സുരക്ഷാ ടിജി പ്രൊജ്രക്ടിന്റെ സഹകരണത്തോടെ ജവഹർ ബാലഭവനിൽ വെച്ച് നടന്ന ക്യാമ്പിൽ 55 പേർ വാക്‌സിനേഷൻ എടുത്തു. ജില്ലാ നോഡൽ ഓഫീസർ ഡോ. ജയന്തി, ജില്ലാ സാമൂഹ്യനീതി ഓഫീസർ പി.എച്ച്. അസ്ഗർ ഷാ, സീനിയർ ക്ലർക്ക് എം. പ്രദീപ്, ബിഫോർ സുരക്ഷ ടിജി പ്രൊജക്ട് മാനേജർ പ്രിയങ്ക എന്നിവർ ക്യാമ്പിന് നേതൃത്വം നൽകി.