മണ്ണുത്തി: പരിസ്ഥിതി സംരക്ഷണത്തിന് ഉന്നൽ നൽകുന്ന സമഗ്രവും സുസ്ഥിരവുമായ വികസനമാണ് സർക്കാർ ലക്ഷ്യമെന്ന് റവന്യു മന്ത്രി കെ. രാജൻ പറഞ്ഞു. മണ്ണുത്തി കൃഷിവിജ്ഞാനകേന്ദ്രത്തിൽ പരിസ്ഥിതി ദിനാചരണത്തിന്റെ ഭാഗമായി വിവിധ ജില്ലാ തല പദ്ധതികളുടെ ഉദ്ഘാടനം നിർവഹിച്ച് സംസാരിക്കുകയായിരുന്നു മന്ത്രി.
കമ്പോള സാധ്യതകളാണ് പ്രകൃതി ചൂഷണം വർദ്ധിപ്പിച്ചത്. ഭൂമിയെ എങ്ങനെ ചൂഷണം ചെയ്യണമെന്നതിന്റെ കലണ്ടർ തയ്യാറാക്കാനാണ് ആധുനിക മുതലാളിത്വത്തിന്റെ ശ്രമം. അതിനെ ചെറുത്ത് പ്രകൃതിയെ പവിത്രമായി നിലനിറുത്തി വരും തലമുറക്ക് സമർപ്പിക്കുകയാണ് നാം ചെയ്യേണ്ടത്. ഒരു കോടി വൃക്ഷത്തൈകൾ നടുന്നതിലൂടെ മൂന്നര മനുഷ്യന് ഒരു മരം എന്ന സങ്കൽപമാണ് വളർത്തി എടുക്കുന്നത്. നൂറ് നാട്ടുമാന്തോപ്പുകൾ സൃഷ്ടിക്കുന്നതിലൂടെ അഭിമാനകരമായ നേട്ടത്തിലേക്ക് സംസ്ഥാനം എത്തുമെന്നും മന്ത്രി പറഞ്ഞു.
പ്രകൃതിയുടെ വിഭവങ്ങളെ പുനരാവിഷ്‌കരിക്കേണ്ടതിന്റെ ആവശ്യകത ഏറെയാണെന്നും പ്രകൃതിയെ സംരക്ഷിക്കുന്നതിനാകണം പ്രധാന്യം നൽകേണ്ടതെന്നും വൈസ് ചാൻസലർ ആർ. ചന്ദ്രബാബു പറഞ്ഞു. മാടക്കത്തറ പഞ്ചായത്തിൽ നടപ്പാക്കുന്ന നൃൂട്രി സ്മാർട് വില്ലേജ് പദ്ധതിയുടെ ഉദ്ഘാടനവും മന്ത്രി നിർവഹിച്ചു. ബ്ലോക്ക് പഞ്ചായത്ത് പ്രസിഡന്റ് കെ.ആർ. രവി, മാടക്കത്തറ പഞ്ചായത്ത് പ്രസിഡന്റ് ഇന്ദിര മോഹൻ, വിവിധ അംഗങളായ പി.എസ് വിനയൻ, സുമിനി കൈലാസ്, സോഫി സോജൻ, രജിസ്ട്രാർ സക്കീർ ഹുസൈൻ, ഡോ.ജിജു പി അലക്‌സ്, കൃഷി ഓഫീസർ ടി.വി ജയശ്രീ എന്നിവർ പങ്കെടുത്തു.