മാള: കൊവിഡ് കാലത്തെ മാനസിക സമ്മർദ്ദങ്ങൾക്ക് ആശ്വാസമായി അതിജീവനം എന്ന ഓൺലൈൻ ക്ലാസ്സുമായി മാള പഞ്ചായത്ത്. ശനി, ഞായർ ദിവസങ്ങളിൽ പഞ്ചായത്തിന്റെ ഒഫീഷ്യൽ ഫേസ്ബുക്ക് പേജിലാണ് ലൈവ് ഓൺലൈൻ ക്ലാസ് സംഘടിപ്പിക്കുക.
പഞ്ചായത്ത് ഹെൽപ് ഡെസ്‌കാണ് ഫേസ് ബുക്ക് ലൈവിന് നേതൃത്വം നൽകുന്നത്. വൈകിട്ട് നാലു മുതൽ അഞ്ചു വരെയാണ് ക്ലാസ്. ആദ്യത്തെ അര മണിക്കൂർ വിവിധ വിഷയങ്ങളിൽ വിദഗ്ദ്ധർ ക്ലാസ്സെടുക്കും. തുടർന്നുള്ള അര മണിക്കൂർ ജനങ്ങൾക്ക് അന്നത്തെ ക്ലാസ്സുമായി ബന്ധപ്പെട്ട സംശയങ്ങൾ ഫേസ് ബുക്കിൽ കമന്റ് രേഖപ്പെടുത്താം. സംശയങ്ങൾക്കുള്ള മറുപടി അപ്പോൾ തന്നെ ലഭിക്കും. വൈറസ് വ്യാപനം, ആരോഗ്യം, മനസിക പ്രശ്‌നങ്ങൾ, വിദ്യാഭ്യാസം, നിയമം, ദാമ്പത്യ ജീവിതം, കൃഷി, കുട്ടികളുടെ സംരക്ഷണം തുടങ്ങിയ എട്ട് വിഷയങ്ങളിലായിട്ടാണ് ക്ലാസ് നടക്കുക. മാള ബ്ലോക്ക് പഞ്ചായത്ത് സന്ധ്യ നൈസൺ ഓൺലൈൻ ക്ലാസിന്റെ ഉദ്ഘാടനം നിർവഹിച്ചു. പഞ്ചായത്ത് പ്രസിഡന്റ് സിന്ധു അശോക്, പഞ്ചായത്ത് യൂത്ത് കോ- ഓർഡിനേറ്റർ എം.എസ്. അഭിജിത് തുടങ്ങിയവർ സന്നിഹിതരായി.